Аллаға шүкір, өңір жұртшылығы бір ай бойы Ораза ұстап, өздерінің мұсылмандық бес парызының бірін өтеді. Өздерін өсек- аяңнан, пайдасы жоқ құлаққа түрпі тиетін сөздерден аулақ ұстады. Қаншама ізгілікті істер атқарылып, көмекке мұқтаж жандар Рамазанның шапағатын сезінді.

Жылдағы қалыптасқан дәстүр бойынша қостанайлықтар таңертеңгі сағат 8-де облыстық Аймағанбет қажы Спанұлы мешітіне жиналды. Ине шаншар орын болған жоқ.

Облыстың Бас имамы Бахытбек қажы Тәжімбет жұртшылықтың алдында сөз сөйлеп, оларды Ораза айт мейрамымен шын жүректен құттықтады. Үлкенді-кішілі қауымға бұл мерекенің өзіндік ерекшелігі туралы айтты.

Сондай-ақ үстіміздегі жылы Ораза ұстаушылардың қатарында жастардың көп болғандығын, еліміздің басты байлығы – халықтар арасындағы достық пен ауызбірлік, мызғымас татулық, өзара түсіністік екендігін тілге тиек етті.

Сонымен қатар әруақтарға Құран бағыштап, барлық ағайындардың отбасына молшылық, ырыс-береке, шадыман-шаттық тіледі.

Мұндай Ораза айт намазы өңірдегі барлық аудандар мен қалалардағы, кенттердегі мешіттерде ұйымшылдықпен өтті.

Қостанай облыстық мешітінің баспасөз қызметі

Белгілі дін қайраткері Шоқан қажы Әмірханов басқаратын Қостанай қалалық "Жайлаубай ата"мешітінің ұжымы биылғы Рамазан айының алғашқы күнінен бастап қайырымдылық акцияларын өткізуге ерекше назар аударды.

Осы мақсатта қаншама шаралар ұйымдастырылып, көмекке мұқтаж жандардың шын мәнінде шынайы алғысына бөленді. Бәрін айтпағанның өзінде, жуырда 10 отбасыға 150 мың теңгенің азық-түлігі салынған "Рамазан қоржыны" себеті тапсырылды.

Бұл орайда мешіт қызметкерлері мен жүрегі жомарт жандардың қыруар іс тындырғандарын айтып өткен жөн.

Қостанай облыстық мешітінің баспасөз қызметі

Рамазан айында Науырзым аудандық «Түркебай ата» мешітінде қайырымдылық мәселесіне айрықша көңіл бөлінді. Мысалы, Қостанай облыстық «Зекет қоры» және еріктілердің қолдауымен 20 отбасына 1 млн теңге көлемінде азық-түлік таратылды.

Сонымен қатар аудандық мешіттің ұйымдастыруымен 10 отбасына 110 мың теңгенің күнделікті тұтынатын өнімдері үлестірілді. Ал демеуші азаматтардың қолдауымен 30 отбасына 300 мың теңгені құрайтын азық-түлік берілді.

Осы арада жоғарыда аталған азық-түліктер негізінен көп балалы, әлеуметтік жағдайы төмен және басқа да жәрдемге мұқтаж отбасыларына таратылды.

Қорыта айтқанда аудан бойынша 60 отбасына 1 млн 410 мың теңгенің қайырымдылық көмегі көрсетілді.

Қостанай облыстық мешітінің баспасөз қызметі

Лисаков қалалық "Әбдіхаим Саламатұлы" мешітінің Бас имамы Әкімбек Асановтың ұйымдастыруымен Қасиетті Рамазан айында мешіт қызметкерлерінің балаларына ойын-сауық шарасы өткізіліп, оларды үлкен қуанышқа бөледі.

Бұл қызықты басқосуда балдырғандарға "Рамазан тәттісі" қоржыны тапсырылды. Оларға басқа да дәмді сусындар берілді. Осылайша біздің болашағымыз болып табылатын бүлдіршіндер де Ораза айының қасиеті мен шапағатын айқын сезінді.

Қостанай облыстық мешітінің баспасөз қызметі

Рамазан айында Науырзым ауданында «Пайғамбарыма (с.ғ.с) салауат» яғни жамағат арасында салауат шариф айтудан жарыс өткізілді. Оның қорытындысы Қасиетті қадір түні көпшілік алдында айтылып, жеңімпаздарға мадақтама қағаздар тапсырылып, сый–сияпат жасалды.

Ер балалар 28 мың салауат айтса, қыз балалар 11 206 салауат шариф оқыды. Сонымен қатар Қадір түні мешітке келген жамағаттарға Сира, сахабалар өмірінен, ислам тарихы, Оразаға қатысты сұрақтар қойылып, тиянақты жауап берген кісілерге сыйлықтар тапсырылды.

Қостанай облыстық мешітінің баспасөз қызметі

Биылғы Қадір түні облыстық мешітте тыңғылықты дайындықтың арқасында жоғары деңгейде өтті. Сөздің орайы келгенде имандылық ордасында қызмет атқаратын барша қызметкерлердің біліктілік пен ұйымшылдық танытқандығын айтып өткеніміз лазым.

Алдын-ала жасалған бағдарламаға сәйкес Құптан, Тарауих, хатым дұғасы оқылды.

Бас имам Бахытбек қажы Тәжімбеттің «Мың айдан қайырлы-Қадір түні» тақырыбындағы уағызы көпшілікке терең мазмұны және танымдық-тағылымдық жағымен ерекше әсер қалдырды.

Сонымен қатар, осынау кеште Бас имам шәкірттерге сертификат табыс етті. Қасиетті Рамазанның барысында білімділігімен жерлестерімізді баурап алған Қариға бата беріп, ежелден келе жатқан ата-дәстүріміз бойынша иығына шапан жапты. Басқа да сый-сияпат жасады.

Қадір түнінде жастардың дүниетанымын кеңейту мақсатында сұрақ-жауап ойыны ұйымдастырылды. Содан кейін «Рамазан - күнәларға кешірім айы» атты орыс тіліндегі уағызды да жамағат ұйып тыңдады.

Кештің соңында «Қаза және Тасбих» намазы оқылып, сәресі ішілді. Үлкенді-кішілі қауым таң намазына жығылды.

Қостанай облыстық мешітінің баспасөз қызметі

Елімізде біраз жылдан бері «Ел үлесі – пәтерге» жобасы қолға алынып, қаншама баспанаға мұқтаж адамдар үйлі-жайлы болды. Бұл аса маңызды қайырымды іс біздің өңірде де нақты жүзеге асырылуда.

Мәселен, осы қасиетті Рамазан айында екі үй көмекке мұқтаж жандарға тапсырылып, «Зекет және қайырымдылық» қорының қызметкерлері олардың қуаныштарына ортақтасты.

Мысалы, 638-ші үй Әуликөл ауданына қарасты Қазанбасы бекетінде тұратын жалғыз басты мүгедек әйел Күлпаш Балғабаеваға тапсырылды.

Ал, 639-шы үй Қарасу ауданының Қойбағар бекетінде ғұмыр кешіп жатқан бауырымыз Нұрбол Құрманғалиға берілді.

Баспанаға зәру кісілерге дер кезінде қол ұшын созып, жомарттық танытқан демеушілерге Алланың нұры жауа берсін!

Қостанай облыстық мешітінің баспасөз қызметі

Науырзым ауданының ақсақалдары «Darhan dala» жобасын насихаттау мақсатында Қостанай облыстық тарихи-өлкетану музейінде болды. Олар Астана қаласынан әкелінген «Алтын адамның» көшірмесі, өзге де қазақ халқының ежелгі жәдігерлері және тарихи құнды естеліктерімен танысты.

Сондай-ақ, ұлтымыздың ұлы тұлғалары Шоқан Уәлиханов Ыбырай Алтынсарин, Ахмет Байтұрсыновтардың және көрнекті ақын-жазушылардың жеке бұйымдарын көзбен көріп, көңілдеріне түйді.

Науырзымдықтарды облыстық ардагерлер кеңесі мен экспозициялық көрменің қызметкерлері жылы жүзбен қарсы алып, ілтипат танытты.

Қостанай облыстық мешітінің баспасөз қызметі

Қостанай облыстық «Аймағанбет қажы Спанұлы» мешітінде қасиетті Рамазан айының құрметіне әр аптаның жұма күндері өңірдегі аудандарды қосқанда, 300-дей отбасына «Рамазан қоржыны» тапсырылды.

Онда күнделікті тұрмыста қолданатын азық-түлік салынған себеттер көп балалы және көмекке мұқтаж отбасыларына таратылды. Сонымен қатар облыстық мешіттің жамағаты, намазхан әрі қажы Зауыр Итаев 30 кісіге зекет табыс етті.

Бұл орайда «Зекет және қайырымдылық» қорының жетекшісі, облыстық мешіттің найб имамы Бақытжан қажы Икрам басқаратын қызметкерлердің ұйымшылдық пен іскерліктің үлгісін көрсеткендігін ерекше атап өткен жөн.

Қостанай облыстық мешітінің баспасөз қызметі

Жақында Қостанай облысының Бас имамы Бахытбек қажы Тәжімбет арнайы іс-сапармен Алтынсарин ауданындағы «Алдиярұлы Жанұзақ» мешітінде болды.

Ол аталған имандылық ордасының тыныс-тіршілігімен танысты. Ораза айына байланысты жайылған ауызашарға қатысып, жамағатпен жүздесті. Онда жұртшылыққа қазіргі таңдағы өзекті тақырыптарды қозғап, ұлағаты мол уағыз айтты.

Мешітте бас қосқан жамағат мазмұны терең уағызды мұқият тыңдап, Бахытбек Нұрғабылұлына өздерінің шынайы алғыстарын білдірді.

Қостанай облыстық мешітінің баспасөз қызметі