Қостанай облысы Амангелді ауданына қарасты Есір ауылында “Тәубе” намазханасы пайдалануға берілді. Онда карантиндік талаптар толық сақталды. Ашылу салтанатына Қостанай облысының Бас имамы Бахытбек қажы Тәжімбет, Арқалық қаласының бас имамы Нұрхан Асанұлы және аудан әкімі Талғат Карбозов қатысты.

Бұл жиында аудан әкімі Талғат Тойшыбекұлы құттықтау сөз сөйлеп, имандылық ордасы ел бірлігін сақтаудың нағыз ұйытқысы болатындығына тоқталды.

Мұндай сауапты істің жүзеге асуына ауыл кәсіпкері Әбілхан Боранбаев үлкен азаматтық танытып, қаржылай демеушілік етті. Ал ауыл тұрғындары мен жастар ұйымшылдықтың үлгісін танытып, өз үлестерін қосты. Сондықтан аудан басшысы оларға деген шынайы алғысын жеткізді.

Сондай-ақ ардақты ақсақалдар жылы лебіздерін білдірді. Жергілікті азаматтардың атынан кәсіпкер Әбілхан Таңатханұлына үлкен құрмет көрсетіп, ат мінгізді.

Қостанай облысының Бас имамы Бахытбек қажы Нұрғабылұлы бауырларымыздың қуанышына ортақтасып, демеушілік еткен жомарт жанға өз атынан “Алғыс хат” табыс етті. Уағыз насихат айтып, Құран аяттарын оқыды.

Басқосу соңында Алла үйінің ашылуына арнайы келген жамағатқа дастарқан жайылды. Сауапты імке ат салысқан кісілерге сый-сияпат жасалды. Құран оқылып, ауылдың сыйлы ақсақалдары бата берді.

Қостанай облыстық мешітінің баспасөз қызметі

Қостанай облысының Бас имамы Бахытбек қажы Тәжімбет кезекті іс сапармен Бейімбет Майлин ауданында болды. Ол алдымен аудан әкімі Қайсар Мұржақыповпен кездесіп, өзекті мәселелер жайлы пікір алысты.

Содан кейін жергілікті «Әйет» мешітіне атбасын бұрып, осындағы алқа мүшелері және қадірменді ақсақалдармен үстіміздегі жылы жүзеге асырылатын жұмыстар жөнінде ақылдасты.

Сондай-ақ аудандық ішкі істер бөлімі қызметкерлерімен болған жүздесу де өте әсерлі өтті. Онда Бас имам қазіргі таңдағы маңызды тақырыптар-ынтымақ пен бірлік, абырой мен ерлік, Отан алдындағы перзенттік парыз хақында уағыз айтты. Тәртіп сақшыларының қойған сұрақтарына нақты жауап берді.

Қостанай облыстық мешітінің баспасөз қызметі

Біз үшін Қазақстанның Тәуелсіздігін нығайтудан артық ештеңе жоқ. Бұл күндері тұтас еліміздің халқы ауыз бірлік пен ынтымақтың жарқын үлгісін көрсетуде.

Осы орайда Науырзым аудандық «Түркебай ата» мешітінің жамағаты ұйымшылдық танытып, блок бекетіндегі полиция қызметкерлеріне түскі және кешкі асты жеткізіп, олардың шынайы алғысына бөленді.

Жергілікті ағайындар қиын қыстау сәтте жұдырықтай жұмылып, баршаны бірге болуға шақырады. Осы жоғарыда аталған мешіттің Бас имамы Есет Ғабдімәліковтың айтуына қарағанда, олар 3 күн бойы тыныштық күзетінде тұрған тәртіп сақшылары үшін ыстық тамақ әзірлеген. Сөйтіп, өздерінің азаматтық парызына адалдық танытты.

Қостанай облыстық мешітінің баспасөз қызметі

Қазіргі елімізде уақытша орын алған төтенше жағдай кезінде бір-бірімізге қолдау көрсетіп, қамқорлық таныту әрбір жүрегі халқым мен мемлекетім деп соғатын азаматтың міндеті.

Соның бірі нақты айғағы ретінде Арқалық қалалық «Мухтасиб Әлмұхаммед» мешітінің Бас имамы Нұрхан Асанұлының жасап жатқан ісін айтуға болады.

Ол Арқалық - Нұр-Сұлтан бағытындағы блок бекетінде және Арқалық- Жолдама, Амангелді, Торғай тас жолындағы қаланы қырағылықпен күзетіп тұрған полиция қызметкерлерімен кездесті.

Ел қауіпсіздігін сақтауға орасан үлес қосып жатқан құқық қорғау саласындағы жігіттерге буы бұрқыраған ыстық құрт көже мен бауырсақты жеткізіп, ілтипат танытты.

Соныммен бірге осындай қыстың қымызы қаланы тазалап жүрген тазалықшыларға да жасалды.

Бас имамның осы адамгершілік қасиеттерін айқын сезінген полиция қызметкерлері мен қала тазалаушылар өздерінің ризашылықтарын білдірді.

Қостанай облыстық мешітінің баспасөз қызметі

Бүгін елімізде жарияланған Жалпыұлттық аза тұту күніне орай ҚМДБ төрағасы, Бас мүфти Наурызбай қажы Тағанұлының бастамасымен барлық мешіттерде Құран хатым дұғасы жасалды. Сауапты шараға еліміздің барлық өңірлеріндегі құлшылық ордалары біріге үн қосып, бүгін бір мезетте қайғылы оқиғада қаза тапқандардың рухына Құран бағышталды.

Елорда төріндегі республикалық «Әзірет Сұлтан» мешітінде Бас мүфти Наурызбай қажы Тағанұлы бастаған дін қызметкерлері Құран хатым дұғасына қатысып, Отан қорғау жолында опат болған сарбаздарымыз бен бейбіт тұрғындардың рухына Құран бағыштады. Мемлекетіміздің Көкбайрағы төмен түсіріліп, күллі Қазақстан халқы қайғыға шомған азалы күнде марқұмдардардың артында қалған туыстары мен жақындарына көркем сабыр сұрап, Жаратушы Алладан жақсылық тіледі.

Сауапты шарадан соң тілшілер қауымына берген сұхбатында Бас мүфти: «Біз өткен желтоқсан айында 2022 жылдың жұмыс жоспарын бекітіп, «1 күнде – 1 Құран хатым» жобасын қолға алған болатынбыз. Мақсатымыз – күн сайын Құранды толық оқып, еліміздің ертеңі үшін құрбан болған бабаларымыздың рухына бағыштау. Бүгін Жалпыұлттық аза тұту күнінде Отан үшін жанын берген азаматтарымыздың рухына арнайы Құран хатым дұғасын бағыштадық. Алла қабыл етсін!

Оқиға кезінде оққа ұшқан бейбіт тұрғындарды Алла мейіріміне алғай. Жаратушы Иеміз жарақат алған жандардың тез арада сауығып кетуін тілейміз. Қиын сәтте әр азамат бірлігін танытып, өз тарапынан қолдау көрсетуде. Біз, дін қызметкерлері де күн сайын дұға жасаудамыз», – деп атап өтті.