Қостанай шаһарындағы Наурыз шағын ауданында жаңа мешіт салынып жатқаны белгілі. Оның құрылысы қаржы тапшылығына байланысты уақытша тоқтағаны да ешкімнен жасырын емес.
Жуырда Қостанай облысының бас имамы Бахытбек Тәжімбет осы имандылық ордасында болып, қызу жүріп жатқан жұмыс барысымен танысты. Ондағы істерді өз көзімен көріп, біраз жайға қанықты.
Осы киелі орынның құрылысын «Архи – Дизайн – 2008» жауапкершілігі шектеулі серіктестікгі құрылысты жүргізуде. Ондағылар да бас имамға жұмыс барынша қарқын алып жатқандығын баяндады.
Егер жұмыс осылай жалғасын тапса, оның пайдалануға беру мерзімі де ұзамайтындығын жасырмады. Лайым, сол күнге аман-есен жетейік, ағайын!
ҚМДБ-ның Қостанай облысындағы
өкілдігінің баспасөз қызметі
2016 жылдың 6 маусымы – қасиетті Рамазан айының бірінші күні!
Ержан қажы МАЛҒАЖЫҰЛЫ,
Қазақстан мұсылмандары діни
басқармасының төрағасы, Бас мүфти
РАҚЫМ АЙЫ – РАМАЗАН ҚҰТТЫ БОЛСЫН!
Аса қамқор, ерекше Мейірімді Алланың атымен бастаймын!
Құрметті мұсылман бауырлар, отандастар!
Баршамызды қасиетті Рамазан айына аман-есен жеткізген Алла Тағалаға сансыз шүкірлер болсын. Сіздерді мүбәрак Рамазан айының келуімен құттықтаймын!
Рамазан – он екі айдың сұлтаны, берекелі де кешірімі мол ай. Күнделікті тіршілік қамымен жүретін пенденің жүрегіне бұл айда иман нұры құйылады. Өйткені, ораза адамды тақуалыққа тәрбиелейді. Сабырлық, қайырымдылық, мейірімділік, бауырмалдық секілді адамдық асыл қасиеттер артып, иман күшейеді. Рамазан – Алланың мейірімі төгіліп, жұмақтың есігі айқара ашылатын, иманды күшейтуге мүмкіндік берілген берекелі ай. Бұл – Жаратушы Иеміздің ұлы сыйы әрі нығметі.
Сауаптар еселеніп жазылатын айда жасалған қайырлы істің қайтарымы адам баласы үшін құпия-сыр. Тіпті, ауыз бекітушіге берілетін сый мен сауап, құрмет пен марапат пайғамбарлар мен періштелерге де белгісіз.
Құдси хадисте Алла Тағала: «Ораза – тек Мен үшін. Оның сыйын (сауабын) Өзім ғана беремін...» – деп оразаның қадірі мен қасиетін, мәні мен маңызын баяндаған.
Шарапаты мен шапағаты мол айда күнәлі істерден бас тартып, сауап жинауға, ішкі дүниемізді тазартуға, Жаратушының разылығына бөленуге асығайық!
Рамазанның қадірін жақсы түсінген сахабалар оразаға алты ай қалған сәттен бастап: «Раббымыз, бізді Рамазан айына аман-есен жеткізе гөр!» – деп дұға еткен. Пенденің осы айда ұстаған оразасы, қосымша құлшылықтары, өзгелерге жасаған қайырымдылығы, барлық сауапты амалдары еселеніп жазылады.
Ораза – күндіз тек ішіп-жеуден өзін шектеу деген сөз емес. Ораза – рухтың азығы, тәннің шипасы. Рамазан жан мен тәнді рухани тазартатын, мұсылман үшін үлкен сабыр мектебі. Аузы берік жандар әдеп білмес пенделердің өзіне жасаған кейбір оғаш іс-әрекеттерін көріп, тұрпайы сөздерін естісе де: «Мен оразамын», – деген бір ауыз сөзбен нәпсісіне тоқтау салып, сабыр сақтайды. Ал сабыр иесіне берілетін сый – жәннат.
Денсаулығына байланысты немесе кәрілік жетіп ораза ұстауға шамасы жетпеген адамдар ауыз бекіткен кісілерге ауызашар берсе, ол да – үлкен сауап. Пайғамбарымыз Мұхаммед (Алланың оған салауаты мен сәлемі болсын): «Алла Тағала ең болмаса бір түйір құрма, тіпті бір ұрттам сумен болса да қамқорлық жасағанға сауап жазады…» – деген.
Биыл маусым-шілде айларына тұспа-тұс келген Рамазанда ауыз бекітуге күннің ыстығы кедергі келтірмейді деп сенеміз. Себебі, оразаны рухани тұрғыдан сезінген жан Алланың теңдессіз сыйынан шет қалғысы келмейтіні хақ.
Рақым айы – Рамазан құтты болсын! Қасиетті айда ұстаған оразамыз, жасаған дұға-тілектеріміз, құлшылық-ғибадаттарымыз, әрбір қайырлы амалдарымыз қабыл болғай! Алла Тағала отбасымызға амандық, жұмысымызға береке-бірлік нәсіп еткей!
Тәуелсіздігіміз баянды, еліміз аман, жұртымыз тыныш болғай! Әумин!
Бүгін «Қазақстан-Қостанай» телеарнасының баспасөз клубында облыстық «Марал ишан» мешітінің бас имамы Бахытбек қажы Тәжімбет алдағы Рамазан айына байланысты баспасөз мәжілісін өткізді.
Бұл басқосуға Қостанай қалалық мешітінің бас имамы Шоқан қажы Әмірханов облыстық мешіттің наиб имамы Азамат Мурзакановтар қатысты.
Онда жиналған журналистер алдында облыстың Бас имамы Рамазан айының ерекшеліктері, талаптары және жасалатын жеңілдіктері жөнінде жан-жақты тоқталды. Сонымен қатар Бас мүфти Ержан қажы Малғажыұлының қасиетті Рамазан айына байланысты халыққа үндеуі жөнінде де жиналғандарды хабардар етті.
Наиб имам Азамат Серікбайұлы орыс тілінде Рамазан айының мән-маңызы жөнінде әңгімеледі.
Осы кездесуде бұқаралық ақпарат құралдарының өкілдерінің қойған сауалдарына нақты жауап берілді.
ҚМДБ-ның Қостанай облысындағы
өкілдігінің баспасөз қызметі
Лисаков қалалық ішкі саясат бөлімінің ұйымдастырумен «Псевдорелигиозные течения, сущность и основные характеристики» атты тақырыпта шаһардағы мәдениет сала қызметкерлерімен кездесу болып өтті.
Осынау жүздесуге Қостанай облыстық «Марал ишан» мешітінің найб имамы, облыстық ақпараттық түсіндіру тобының мүшесі Азамат Мурзаканов қатысты.
Басқосуда наиб имам күн тәртібіндегі маңызды мәселе бойынша тағылымды әңгіме өрбітті. Қазіргі таңда қоғамдағы дін мәселелеріне тоқтала келіп, теріс ағымдардың зиянын тілге тиек етті.
Аталған кездесуде шіркеу қызметкері Олег әкей де өзінің ой-пікірлерін ортаға салды. Жүздесудің соңында Азамат Серікбайұлы жергілікті ақпарат құралдарына сұхбат берді.
Қазақстан мұсылмандары діни басқармасының төрағасы,
Бас мүфти Ержан қажы МАЛҒАЖЫҰЛЫНЫҢ
қасиетті Рамазан айына байланысты халыққа
ҮНДЕУІ
Аса қамқор, ерекше Мейірімді Алланың атымен бастаймын!
Құрметті отандастар, бауырлар! Баршаңызды күллі мұсылман баласы сағына күткен, берекелі, қасиетті Рамазан айының келуімен шын жүректен құттықтаймын. Рамазан мүбәрәк болғай!
Рамазан – жалпыға ортақ ізгі амалдар маусымы. Ораза – тәрбие, сабыр, қайырымдылық, ізгілік мектебі.
Рамазан – қайырымды жандар үшін үлкен мүмкіндік. Оразада жасалған Жаратушы Иемізге ұнамды әрбір қайырлы іс – үлкен сауап. Пайғамбарымыз Мұхаммед (Алланың оған салауаты мен сәлемі болсын) бір өсиетінде: «Адамдардың жақсысы – елге пайдасы тигендері», – деген. Адам қалай ниет етсе, сол мақсатына жетеді.
Әр пенде сауапты амалымен, тақуалығымен Алланың алдында дәрежесі артады. Жомарт, жанашыр азаматтарды, кәсіпкерлерді көмекке мұқтаж адамдарға қамқорлық көрсетуге, мәселен, су тасқынынан үйсіз, шарасыз қалған отандастарымызға қайырымдылық жасауға, табиғи апат салдарынан бұзылған үйлерді жөндеуге қол ұшын беруге, жетім мен жесірге мейірімділік танытып, қараусыз қалған қарттарға көңіл бөлуге шақырамын.
Зекет беру – жағдайы келген (шариғат бойынша нисап мөлшеріне жеткен) мұсылманға парыз. Ал зекет берекелі Рамазан айында берілсе, оның да сауабы еселеніп жазылады.
Қасиетті айдың құрметі үшін азық-түлік, көкөніс пен тұрмыстық заттарға жеңілдік жасалып, Құдайы астар мен садақалар ауызашар уақытында ұйымдастырылса, тойлар ішімдіксіз өткізілсе, жамандықтың бастауы болған арақ-шараптың сатылуына барынша жол берілмесе деген тілегімді білдіремін.
Сонымен қатар, көпшілік жұртқа оразаның әр күнінде бір жақсылық жасауды жоспарлап, осынау сауапты амалдарды ықыласпен орындауға, Алланың әрдайым бізге үздіксіз нәсіп ететін нығметтерінен садақа беруге шақырамын. Ізгі амалдар Рамазаннан кейінгі айларда да жалғасын тапса игі.
Рамазан – бірлік айы. Осы айда берілетін ауызашарлар ағайын-жұрттың арасын жақындастырып, игі іс-шаралар мен қайырымдылық акциялар халқымызды сенімі мен нәсіліне қарамай, ортақ мақсатқа үндейді. Бүкіл әлемнің Жаратушысы барша адамға: «Бөлінбеңдер», – деп бауырмал болуға бұйырған. Бірлігі күшті елдің берекесі артады. Бірлігімізге бекем болайық!
Қадірлі жамағат! Сауабы еселеніп жазылатын қасиетті айда жасаған амалдарымыз бен ізгі ниеттерімізді Алла Тағала қабыл еткей! Әумин!
Бүгінгі сәби – егемен еліміздің ертеңгі болашағы. Сондықтан жас өрендеріміз саналы да тәрбиелі болып қалыптасуы керек.
Міне, осы мәселеге айрықша назар аударған халықаралық балаларды қорғау күніне орай Арқалық қалалық «Мухтасиб Әлмұхаммед» мешіті шаһарадағы «Жұмыспен қамту және әлеуметтік бағдарламалар бөлімі» мемекемесімен бірлесе отырып, «Бала өмірдің гүлі» атты қайырымдылық шарасын ұйымдастырды.
Мұнда мүмкіндігі шектеулі сәбилер өз өнерлерін көрсетті. Олар ән айтып, сахналық қойылымдар қойды. Демеушілердің қолдауымен аталған бүлдіршіндерге естелік сыйлықтар және тәттілер табыс етілді.
Сондай-ақ мешіт жанында дәріс алып жатқан 22 шәкірттерге түстік аспен бірге балмұздақтар беріліп, түрлі сыйлықтар таратылды.
-Мұндай шараны өткізудегі мақсат - бүлдіршіндерді мерекесімен құттықтай отырып, оларға шадыман шаттық сыйлау еді. Олардың жүздеріндегі қуанышты көргенде толқымаған кісі жоқ, - дейді қалалық мешіттің бас имамы Бектұрсын Уәлиев.
ҚМДБ-ның Қостанай облысындағы
өкілдігінің баспасөз қызметі
Шынында да бала бауыр етің емес пе? Мұны әрбір ұл-қыз өсіріп отырған ағайындар жақсы түсінеді.
Халықаралық балаларды қорғау күніне орай облыстық Марал ишан мешіті мен «Зекет» қорының өкілдігі облыстық көркем-сурет мектебінде жасөспірімдер арасында шахматтан турнир өткізді.
Турнирді Қазақстан қажылар қауымдастығының Қостанай облыстық филиалының төрағасы Жақсылық Ғайсин ашты.
Жарысқа қатысушыларды Қазақстан мұсылмандары діни басқармасының Қостанай облысындағы өкіл имамы Бахытбек Тәжімбет балаларды шын жүректен құттықтады.
Шара соңында жеңімпаздарға бағалы заттар мен сыйлықтар тапсырылып, дастархан жайылды.
Сонымен қатар Қостанай қалалық мешіті де өз тарапынан облыстық балалар үйінде балаларға дастархан жайып, балаларға сыйлық ұсынды.
Жуырда Қостанай облысы әкімдігінің Дін істер басқармасында тәрбиелік тағылымы ерекше жүздесу болып өтті. Оған Қостанай облысының бас имамы Бахытбек Тәжімбет бастаған қалалар мен аудандардың бас имамдары мен басқарманың мамандары қатысты.
Бұл жиының мақсаты облыстағы ақпараттық түсіндіру тобын құру және алдағы жасалатын жұмыстарды жоспарлау болатын.
Сонымен бірге, теріс ағымдағы көзқарастағы тұлғаларды дәстүрлі ислам дініне бет бұрғызуға бағытталған оңалту жұмыстары туралы жан-жақты айтылды. Алда тұрған нақты міндеттер айқындалды.
Жүздесу барлық қатысушыларға үлкен ой салды. Өңірде дінімізді насихаттау мен басқа да маңызды мәселелер талқыланды.
ҚМДБ-ның Қостанай облысындағы
өкілдігінің баспасөз қызметі
Миләди
Хижри
