Ұзынкөл ауданының Бас имамы Есенкелді қажы Сақтағанұлы Ораза айт күні жергілікті шіркеудің басшысы Юрий Петровичпен ақылдаса отырып, ынтымақтастық пен бірлікті нығайту мақсатында жастарға арналған футболдан іс-шараны ұйымдастырды.

Ынталы жастар бастаманы қолдап, спорттық шараға белсене қатысты. Ауданның дін басшылары жиналғандарға еліміз үшін аса маңызды ауызбірлік, сыйластық және достық туралы насихат айтты.

Футбол ойынынан кейін «Құрман баба» мешітінің асханасында Айт мейрамына арналған дастархан жайылды. Оған өзге ұлт өкілдері де шақырылды.

Ұзынкөлдіктер Бас имамның халықты ынтымаққа үндейтін басқосуды өткізуге мұрындық болғаны үшін ризашылықтарын білдірді.

Сонымен қатар Бас имам «Айгөлек» балабақшасында да болды. Онда кішкентай бүлдіршіндерді айт мерекесімен құттықтап, сыйлықтар табыс етті.

Тәрбие орнының ұжымы Есенкелді қажыға ыстық ілтипаты үшін өздерінің шынайы алғыстарын білдірді.

Қостанай облыстық мешітінің баспасөз қызметі