Лисаков қалалық «Әбдіхаим Саламатұлы» мешітінің Бас имамы Әкімбек Асанов қасиетті жұма намазынан кейін мешітке жиналған жамағатқа Осман Тоханың Құран кітабын табыс етті.

Ол сонымен қатар Рамазан Құран айы жөнінде насихат айтты. Бас қосқан қауымға құнды еңбектің мән-маңызын түсіндіріп, үстіміздегі жылы әрбір отбасыға ырыс-береке мен молшылық тіледі.

Қостанай облыстық мешітінің баспасөз қызметі

Қыстың көзі қырауда үйіңде жылу болмаса береке болмайтыны айдан анық. Осы орайда Әулекөлдік қайырымды азаматтарының қолдауымен "Жылулық сыйла" қайырымдылық акциясының аясында сол елдің жалғыз басты отбасына жақсы сапалы шұбаркөл көмірі түсіріліп берілді.

Бұл шара күн суытып, пешке от жағу мерзімі басталғаннан бері аталмыш ауданда дәл осындай көмек көрсетілген 8-ші жанұя. Әрине, қамқорлыққа бөленген жандар мешіт қызметкерлері мен демеушілерге шынайы алғысын білдіруде. Біздің күшіміз бірлікте деген ұранды ұстанған жомарт жандар көбей бергей.

Қостанай облыстық мешітінің баспасөз қызметі

Облыстық «Аймағанбет қажы Спанұлы» мешітінің жанындағы Зекет және қайырымдылық қорының қызметкерлері үстіміздегі жылдың алғашқы айын да нәтижелі жұмыстармен бастады.

Мәселен, найб имам Бақытжан қажы Икрамның айтуына қарағанда, өткен қаңтар айында өңір бойынша қайырымдылық үшін 38 іс-шара ұйымдастырылды.

Онда 121отбасына нақтылы көмек көрсетілді. Осы мақсатқа 3 378 300 теңге жұмсалып, қолдауға мұқтаж жандардың шынайы алғысына бөленді. Бұл орайда демеуші және жанашыр азаматтардың тарапынан айрықша қамқорлық танытылғанын атап өткеніміз жөн.

Қостанай облыстық мешітінің баспасөз қызметі

Қостанай облысы бойынша «Қамқор - шарапат» орталығының өкілі Ерлан Өмірбекұлы және Тобыл қаласындағы «Маңдай батыр» мешітінің Бас имамы Дархан Манарбекұлы Қостанай ауданы әкімінің орынбасары Қайрат Тынымбайұлымен кездесіп, өзекті мәселені талқылады.

Олар жүздесуде «Зират және зиярат мәдениеті» туралы құжаттың маңыздылығы хақында әңгімеледі. Елімізде қалыптасқан дәстүр бойынша дүниеден өткен кісіні жерлеуді бірізділікке түсіру және ауданда жер телімін бөлу жайын сөз етті.

Қостанай облыстық мешітінің баспасөз қызметі

Аудандық «Әмит ишан» мешітінің Бас имамы Нұрбол қажы Балахмет Аманқарағай ауылындағы қазақ орта мектебінің ұстаздарымен кездесті.

Онда белгілі дін қайраткері қатысушыларға деструктивтік ағымдардың алдын алуға байланысты насихат айтты. Сонымен қатар Бас мүфти Наурызбай қажы Тағанұлының үстіміздегі жылды «Ислам және дәстүр құндылықтары» деп жариялағанына тоқталды.

Жасөспірімдерге дініміздін баға жетпес құндылықтарын ұлттық дәстүрмен ұштастырып, оларды патриоттық рухта тәрбиелеу аса маңызды екендігін сөз етті.

Қостанай облыстық мешітінің баспасөз қызметі

Таяуда Сарыкөл аудандық «Аққозы қажы» мешітінің қыз балаларға дәріс беретін ұстаз Фатима Асанова аудандық кітапхана қызметкерлерімен кездесіп, көкейде жүрген ойларын ортаға салды.

Мәселен, онда «Зорлық - зомбылықтың алдын алу» тақырыбы қозғалып, уағыз айтылды. Жүздесу соңында қатысушылардың қойған сауалдарына нақты жауап берді.

Руханият ордасындағы ұйымдастырылған бұл басқосу қызметкерлерге үлкен әсер қалдырды.

Қостанай облыстық мешітінің баспасөз қызметі

Еліміздің жарқын болашағы арамызда жүрген өскелең ұрпақ екені белгілі. Оларға сапалы білім, саналы тәрбие беру тек ұстаздар ғана емес, баршамыздың міндетіміз.

Бұл орайда Есенкелді қажы Сақтағанұлы басқаратын Ұзынкөл аудандық «Құрман баба» мешітінде өзгелерге өнеге боларлық маңызды басқосулар жиі өткізіледі.

Осы сөзіміздің айғағы ретінде жуырда жергілікті жастар ұйымдары және белсенді жастармен «Исламдағы жас отбасының құндылықтары», «Жастар және дәстүр» тақырыптарында тартымды кездесулер ұйымдастырылды.

Аталмыш жиындарда үкілі үмітіміз болып табылатын жігіттер мен қыздарға ой саларлық тағылымды әңгімелер өрбіліп, құнды пікірлер ортаға салынды.

Қостанай облыстық мешітінің баспасөз қызметі

Облыстық «Аймағанбет қажы Спанұлы» мешітіндегі имамдардың басқосуында Бахытбек қажы Нұрғабылұлы өткен жылғы атқарылған жұмыс қорытындысы бойынша Бас мүфтидің атынан бірқатар имамдарды құттықтап, оларға Алғыс хаттарды табыс етті.

Олардың қатарында дін қайраткерлері - облыстық мешіттің найб имамы Әлішер Балахмет, Қостанай қалалық «Марал ишан» мешітінің Бас имамы Бектұрсын Уәлиев, Ұзынкөл аудандық «Құрман баба» мешітінің Бас имамы Есенгелді Әжімахантегі, Қарасу ауданының Бас имамы Халық Әбсаттаров, Қостанай ауданына қарасты «Алтын дала» ауылдық мешітінің молдасы Берік Хамитұлы бар.

Ұзақ жылғы жемісті қызметі үшін Қарасу ауданының Бас имамы Халық Әбсаттаровқа шипажайға жолдама берілді.

Қостанай облысының Бас имамы Бахытбек қажы Тәжімбет өңірде адал еңбегімен дараланған және дін саласында қызмет атқарып жатқан 12 адамға Алғыс хаттарды табыс етті.

Мәселен, облыс орталығындағы «Жайлаубай ата» - «Ең үздік қала мешіті», «Тойғанша ана» - «Ең үздік ауыл мешіті» атанды. Марапатқа ие болғандардың қатарында «Үздік мешіт тазалықшысы» деген номинация да бар.

Қостанай облыстық мешітінің баспасөз қызметі

Қазақстан мұсылмандары діни басқармасының төрағасы, Бас мүфти Наурызбай қажы Тағанұлы үстіміздегі Ұлу жылын «Ислам және дәстүр құндылықтары» жылы деп атады.

Осыған байланысты Қостанай облыстық мешітінде 2024 жылдың алғашқы жиыны болып өтті. Оған өңірдегі аудандар мен қалалардың бас имамдары және бөлім басшылары қатысты.

Облыстың Бас имамы Бахытбек қажы Тәжімбет Бас мүфтидің бағдарламалық баяндамасы жайлы жан-жақты айтып берді. Имамдардың алдында тұрған міндеттері мен атқарылар нақты жұмыс жоспарына тоқталды.

Қостанай облыстық мешітінің баспасөз қызметі

Қазақстан мұсылмандары діни басқармасының жанынан құрылған «Қамқор – Шарапат» салттық қызмет көрсету орталығының тапсырмасына сәйкес Ұзынкөл аудандық «Құрман баба» мешітінде дәріс өткізілді.

Онда қазіргі таңдағы маңызды мәселе - «Мәйітті арулап аттандыру» тақырыбы жан-жақты сөз болды. Жиын барысында жамағат тарапынан бірнеше сауалдар қойылып, оған нақты жауап берілді.

Ерекше атап өтер жай, тәжірибелі де беделді дін қайраткері Есенгелді қажы Әжімахантегі мұндай жұртшылыққа берері мол басқосуларды жиі ұйымдастыруды дәстүрге айналдырған.

Қостанай облыстық мешітінің баспасөз қызметі