Қарабалық аудандық ардагерлер ұйымы кеңсесінде өткен жиында «Ас беру», «Зират және зиярат» мәдениеті туралы маңызды құжаттар таныстырылды. Оған жергілікті ақсақалдар, зиялы қауым және ақ жаулықты аналар қатысты.

«Ғашура ана» мешітінің Бас имамы Серік Темірбекұлы аталған құжаттарға жан-жақты тоқталып, өз ойын ортаға салды. Қазақстан мұсылмандары діни басқармасының ұстанған бағытын ардагерлер қолдап, қаралған мәселелер ұлтымыздың салт-дәстүріне сай келетіндігін айтты.

Жоғарыда аталған басқосуға арқау болған жай қазіргі таңда елімізде қолға алынып жатқан діни рәсімдерді уақыт талабына сай бір ізділікке түсіріп, жұртшылыққа жете ұғындыру болатын.

Қостанай облыстық мешітінің баспасөз қызметі

Жақында Қостанай қалалық "Жайлаубай ата" мешітінде қасиетті Мәуліт айында 3-ші рет Адамзаттың асылы Мұхаммед Пайғамбарымызға арналып "Салауат-шариф" оқылды. Шақырылған қонақтарға дастарқан жайылды.

Басқосудан соң мерекеге демеушілік еткен іскер азаматтарға бата беріліп, аруақтарға Құран бағышталды. Имандылық ордасындағы осындай есте қаларлық сәттер алдағы уақытта да жалғасын таба бермек.

Қостанай облыстық мешітінің баспасөз қызметі

Таяуда Тобыл қаласындағы «Маңдай батыр» және Рудный шаһарындағы «Нұр» мешіттерінің бас имамдары Дархан Сыздықов пен Сабыржан Есмурзин Қостанай аудандық халыққа қызмет көрсету орталығы ұжымымен кездесу өткізді.

Облыста беделді дін қайраткерлері бұл басқосуда қазіргі таңдағы аса маңызды тақырыптар – Зайырлылық, Отан туралы, жат ағымдардан сақтану жөнінде өздерін толғандырып жүрген ойларын ортаға салды.

Білікті қызметкерлер оларға тағылымы мол жүздесу үшін шынайы алғыстарын білдірді.

Қостанай облыстық мешітінің баспасөз қызметі

Жуырда Жітіқара ауданының бас имамы Айбек Аманқосұлы жергілікті №39 түзету мекемесінде бас бостандығынан айырылған азаматтарды бақылаушы қызметкерлермен кездесті.

Жүздесу барысында Дәстүрлі ислам құндылықтар және жат ағымдардан сақтануға байланысты көкейде жүрген ойларын ортаға салды. Қатысушылар оның пікірін ұйып тыңдап, көп жайды көңілдеріне түйді.

Қостанай облыстық мешітінің баспасөз қызметі

Қазақстан мұсылмандары діни басқармасының Қостанай облысындағы өкіл имамы Бахытбек қажы Тәжімбет талай өзекті мәселелерді қамтыған жиындарға тікелей ұйытқы болып келеді.

Ол осы сөзіміздің жарқын бір айғағы ретінде жуырда ғана еліміздің жарқын болашағы болып табылатын жастармен кездесу өткізді. Бұл жүздесуге негізінен елімізде белең алған құмар ойыны яғни адам баласын құрдымға жетелейтін лудомания тақырыптары арқау болды.

Басқосуда белгілі дін қайраткері қозғалған маңызды мәселе бойынша көкейде жүрген ойларын ортаға салып, қатысушылардың толғандырған сауалдарына тиянақты жауап берді.

Қостанай облыстық мешітінің баспасөз қызметі

Қасиетті Мәуліт айы өңірімізде ұйымшылдықпен өткізіліп, жұртшылық тарапынан үлкен ілтипатқа ие болуда. Мәселен, Арқалық қалалық «Мухтасиб Әлмұхаммед» мешітінде Мұхаммед Пайғамбардың мағыналы ғұмырын паш ететін салауаттар айтылды.

Сондай-ақ, екінші күні салауатты өмір салтын насихаттау мақсатында футболдан турнир ұйымдастырылды. Жиналған халық өздерінің ризашылығын білдірді.

Қостанай облыстық мешітінің баспасөз қызметі

Қостанай қалалық «Жайлаубай ата» мешітінде демеушілердің қолдауы арқасында 45 отбасыға 120 қап картоп таратылды.

Осындай қамқорлыққа бөленген шаңырақ иелері имандылық ордасының қызметкерлері мен жүрегі жомарт азаматтарға шынайы алғысын білдіріп, батасын берді.

Сөйтіп, Шоқан қажы Әмірханов басқаратын мешіт ұжымы қасиетті Мәуліт айында көмекке мұқтаж жанұяларға шапағаттарын тигізіп жатқаны өте құптарлық сауапты іс емес пе.

Қостанай облыстық мешітінің баспасөз қызметі

Жітіқара аудандық «Ержан Тәтішев» мешітінің әйелдер жамағаты арасында «Әлемнің рахым нұры әз Пайғамбар» атты интеллектуалды білім сайысы болып өтті.

Ондағы мақсат - жамағаттың сауаттылығын арттыру, Мұхаммед Пайғамбарымыздың ғибратты ғұмырын насихаттау. Сондықтан жарысқа қатысушылар жан-жақты дайындықпен келді.

Сайыстың қорытындысы бойынша жеңімпаздарға ұялы телефон және қаржылай сыйлықтар табыс етілді.

Қостанай облыстық мешітінің баспасөз қызметі

ҚМДБ жылдық жоспар негізінде Қостанай облысында «Асаба болу – өз ісің, әдептен озбау – борышың» атты асабалар жиыны өтті.

Мүфтият бастамасымен биылғы жыл «Ислам және ізгі қоғам» жылы деп жариялануына орай Қостанай облысы өкілдігінің ұйымдастыруымен Қостанай облыстық «Аймағанбет қажы Спанұлы» мешітінің бас имамы Тәжімбет Бахытбек Нұрғабылұлы облысымыздағы асабаларға арналған дөңгелек үстел өткізді. Іс-шараның мақсаты – ізгі қоғам құруда қазақтың торқалы тойларының тізгінін ұстап жүрген асабаларымызға той өткізудің әдебі мен маңызы туралы талқылау болды. Жиырмаға жуық асаба жиналған келелі кездесуде бүгінгі той-томалақта болып жатқан өрексел қателіктер мен кемшіліктер турасында сөз қозғалды.

Сонымен қатар, Қостанай облыстық «Аймағанбет қажы Спанұлы» мешітінің наиб имамы Туребаев Тимур Құрманғазыұлы да, тойды жүргізуші асабаларға дәстүрді ғана дәріптемей, шариғат шеңберінде тойды жүргізуде аса маңызды екенін де түсіндірді.

Қостанай облыстық мешітінің баспасөз қызметі

Жуырда Әулиекөл аудандық "Әмит ишан" мешітінде Мұхаммед Пайғамбарымызға арналып салауаттар айтылды. Сөйтіп, Мәуліт мерекесі жоғары деңгейде өткізілді. Бұл маңызы терең жиынға облыстық "Аймағанбет қажы Спанұлы" мешітінің найб имамы Әлішер Балахмет, Тобыл қаласындағы "Маңдай батыр" мешітінің бас имамы Дархан Сыздықов, қари Темірлан Сейфуллин қатысып, Мәуліт қасидасын оқыды.

Содан кейін мерекенің құрметіне жұртшылыққа мешіт асханасында дастархан жайылып ас берілді. Осылайша рухани кештен жергілікті ағайындар үлкен әсер алып, жоғары көңіл-күймен тарасты.

Қостанай облыстық мешітінің баспасөз қызметі