Елордада Қазақстан мұсылмандары діни басқармасының ұйымдастыруымен өткен Түркі мемлекеттері ұйымы Мүфтилер алқасының V мәжілісінде «Ислам жергілікті халық дәстүрін қолдайды» құжаты қабылданды.

Аталған құжат мәтінінде: «Дін мен дәстүрдің сабақтастығы түркі халықтарының мәдениетінде ерекше орын алады. Біз осы маңызды мәселені шариғи тұрғыдан халыққа түсіндіруді жөн санаймыз. Біздің мақсатымыз – сан ғасырлардан бері қалыптасқан дәстүрлі діни танымымызды жаңсақ жорамалдардан қорғау. Дін мен дәстүрімізден бүр жарған ұлттық болмысымызды, әдет-ғұрпымызды сақтау. Ежелден қалыптасқан мұсылманшылық дәстүрлерімізді, мәзһабымыз бен мектебімізді қайта жаңғыртып, ғасырлардан жеткен мұраларымызға ие болу. Қоғамды ынтымаққа ұйытатын, бірлікке бастайтын құндылықтарды қадірлеу. Дәстүрінен, дінінен, ділі мен тілінен, әдет-ғұрпынан ажыраған елдің болашағы жоқ. Сол үшін рухани құндылықтарымызды құнттай білу аса маңызды» делінген.

Бүгін елордасы Астанада Түркі мемлекеттері ұйымы Мүфтилер алқасының V мәжілісі басталды.

Жиынға Қазақстан мұсылмандары діни басқармасының төрағасы Наурызбай қажы Тағанұлы, Түркия Дін істері басқармасының төрағасы Али Ербаш, Кавказ мұсылмандары діни басқармасының төрағасы Шейхул-Ислам Аллашүкір Паша-Заде, Өзбекстан мұсылмандары басқармасының төрағасы, шейх Нуриддин Холикназар, Қырғызстан мұсылмандары діни басқармасының төрағасы Абдулазиз қажы Закиров, сондай-ақ Түркі мемлекеттері ұйымы бас хатшысының орынбасары Мирвохид Азимов, дін ғалымдары, имамдар, БАҚ өкілдері қатысуда.

Мәжілісте «Ислам жергілікті халық дәстүрін қолдайды» құжаты мен «Фиқһ мектебінің пәтуа беруге қатысты» ережесі құжаты қабылданбақ.

Сонымен қатар, бүгін «Қожа Ахмет Ясауи және оның рухани мұрасы» тақырыбында халықаралық ғылыми-теориялық конференция өтеді.

Жыл сайын Халықаралық қарттар күні Қостанай өңірінде де тиісті деңгейде аталып өтеді. Биыл да бұл мереке арамызда жүрген ардақты ақсақалдар мен ақ жаулықты аналарымыздың естерінде қаларлықтай ұйымдастырылды.

Облыстық «Аймағанбет қажы Спанұлы» мешітінен бастап барлық қалалар мен аудандардың имандылық ордаларында жайылған дастархан басында аға буын өкілдерінің атына жылы лебіздер айтылды.

Атап айтқанда, олардың еліміздің өркендеуіне сіңірген еңбектері мен өскелең ұрпаққа ұлағатты тәрбие берудегі көрсетіп жатқан өнегелері жан-жақты сөз болды. Сый-сияпат жасалды.

Ақсақалдар өз кезегінде имамдарға шынайы алғысын білдіріп, ақ батасын берді.

Қостанай облыстық мешітінің баспасөз қызметі

Жақында Қостанай аудандық «Маңдай батыр» мешіті ұжымының ұйымдастыруымен Мәуліт мерекесі өткізілді. Оған облыстың Бас имамы Бектұрсын Уәлиев, қалалық «Жайлаубай ата» және «Марал ишан» мешіттерінің имамдары Шоқан Әмірханов, Сабыржан Есмурзин, дін қызметкерлері мен жергілікті жамағаттар қатысты.

Осынау рухани кеште облыстық «Аймағанбет қажы Спанұлы» мешітінің найб имамы Әлішер Балахмет, белгілі журналист Заңғар Санай, «Маңдай батыр» мешітінің Бас имамы Дархан Сыздық және болашағынан мол үміт күттіретін жас қари Әлібек Қылышбекұлы Мәуліт хасидасын оқыды.

Жұртшылыққа үлкен әсер қалдырған жиында Бектұрсын қажы Торғайбайұлы уағыз-насихат айтты. Содан кейін Дархан Манарбекұлы қарттар күніне орай ақсақалдарды құттықтап, сый-сияпат жасады. Барлық қатысушыларға алғысын білдірді.

Басқосу соңында абыз ақсақал ақ батасын берді. Мұсылман бауырларымыз құптан намазы оқып, жоғары көңіл-күймен тарқасты.

Қостанай облыстық мешітінің баспасөз қызметі

Бәлкім көзі қарақты оқырманның есінде болар, өңірде зираттарды тазалау жұмыстары жүріп жатыр. Қазан айының алғашқы күні Қостанай облысының Бас имамы Бектұрсын қажы Уәлиевтің бастамасымен «Әуежай» шағын ауданындағы зираттың айналасы тазартылды.

Бұл сауабы мол іске облыстық «Аймағанбет қажы Спанұлы», қалалық «Жайлаубай ата» мен «Марал ишан» мешіттерінің имамдары, дін қызметкерлері мен жамағаттар белсене атсалысты.

Аталмыш зираттағы жиналған қоқыстарды тасымалдауға «АБЗ плюс» жауапкершілігі шектеулі серіктестігінің ұжымы техника жағынан қолдау көрсетті.

Алдағы уақытта да мұндай жұмыстар жыл сайын көктем және күз айларында жалғасын тауып, мұсылман бауырларымыз өздерінің лайықты үлестерін қоса бермек.

Қостанай облыстық мешітінің баспасөз қызметі

Қостанай қалалық «Жайлаубай ата» мешітінің ұжымы тәжік диаспаросының жанашырларымен бірге Мәуліт-шариф оқуын үйымдастырды.

Оған қаламен іргелес жатқан арнайы «Алтын дала» және Жамбыл ауылының имамдары бастаған жамағаттар қатысып, жиынның мәртебесін арттырды.

Қазақстан мұсылмандары діни басқармасының жанындағы «Қамқор-шарапат» салттық қызмет көрсету орталығының басшысы салауат-шарифті тыңдап, ерекше әсер алды. Басқосудан кейін құптан намазы оқылды.

Қостанай облыстық мешітінің баспасөз қызметі

Қазақстан мұсылмандары діни басқармасының төрағасы, Бас мүфти Наурызбай қажы Тағанұлы Тараз қаласында өткен «HALAL EXPO-2024» халықаралық көрмесінің ашылу салтанатында бірқатар үздік халал кәсіпорындар мен мамандарды марапаттады.

Жиында Қостанай облыстық өкілдіктің жұмысы да жақсы жағынан аталды. Өңіріміздегі халал индустриясын дамытуға айтарлықтай үлес қосып жүрген Әлішер Ертайұлы Балахмет «Үздік маман - 2024» номинациясы бойынша таңдаулылар қатарында аталып, облыстың абыройын асқақтатты.

Жас та болса біліктілігімен дараланған ізденімпаз бауырымызды марапатымен шын жүректен құттықтаймыз.

Қостанай облыстық мешітінің баспасөз қызметі

Жақында Арқалық қаласындағы политехникалық колледждің №2 жатақханасында студенттермен тағылымды кездесу болып өтті.

Онда жергілікті "Мухтасиб Әлмұхаммед" мешітінің Бас имамы Нұрхан Асанұлымен "Иман - жүрек айнасы" деп аталатын рухани-мәдени іс-шара ұйымдастырылып, қатысушыларға үлкен әсер қалдырды.

Басқосу барысында оқып жатқан жастар көкейде жүрген сауалдарын қойып, оған тиянақты жауап алды.

Қостанай облыстық мешітінің баспасөз қызметі

Лисаков қалалық «Әбдіхаим Саламатұлы» мешіті алқа мүшелерінің жиыны болып өтті. Онда бас имам Әкімбек Асанов «Ас беру мәдениеті», «Зират және зиярат мәдениеті» жайлы жан-жақты түсіндірді.

Сонымен қатар жаназа, қырқы, жылдық астарда ысырапшылдыққа жол бермеу жөнінде тілге тиек кетті. Ақсақалдар имамның өзекті мәселені қозғаған уағызын мұқият тыңдады. Оның пікірін бір ауыздан қолдады.

Алқа мүшелері өздерін толғандырған сауалдарын қойып, тұшымды жауап алды. Жиын соңында ардақты ақсақал Есенгелді Амантаев бата берді.

Қостанай облыстық мешітінің баспасөз қызметі

Бүгін Қостанай облысының Бас имамы Бектұрсын қажы Уәлиев кезекті іс-сапармен Рудный қаласында болды. Ол жергілікті «Нұр» мешітінде жамағатпен кездесіп, жұма уағызын өткізді.

Жиналған жұртшылықтың алдында осы имандылық ордасын басқарған Сабыржан Есмурзинді жемісті қызметі үшін ризашылығын білдіріп, халықтың атынан иығына шапан жапты.

Сондай-ақ, жамағатқа Қазақстан мұсылмандары діни басқармасының төрағасы, Бас мүфти Наурызбай қажы Тағанұлының бұйрығымен «Нұр» мешітіне Бас имам болып тағайындалған Серік Рақымды таныстырып, жаңа жауапты жұмысында сәттілік тіледі.

Рудныйлықтар Серік Темірбекұлын жылы қабылдады. Ол бұған дейін Қарабалық аудандық «Ғашура ана» мешітінде басшылық етті.

Қостанай облыстық мешітінің баспасөз қызметі