Наурызбай қажы ТАҒАНҰЛЫ,
ҚМДБ Төрағасы, Бас мүфти

РАМАЗАН – РУХАНИ КЕМЕЛДЕНУ АЙЫ

Сіздерді исі мұсылман баласы асыға күтетін, он екі айдың сұлтаны болған қасиетті Рамазан айының келуімен шын жүректен құттықтаймын! Әр шаңыраққа бірлік пен береке, бақыт пен шаттық тілеймін! Рамазан айы құтты болсын!

Алла Тағала қасиетті Құранда: «Уа, иман келтіргендер! Өздеріңе дейінгі қауымдарға парыз етілгендей тақуалыққа жетулерің үшін сендерге де ораза ұстау парыз етілді» («Бақара» сүресі, 183-аят) деп баяндайды. Шариғатымыз бойынша балиғатқа толған, ақыл-есі дұрыс әрбір мұсылманға Рамазан айында ораза ұстау – парыз. Алайда жолаушылар, науқас жандар мен сырқаты асқынып кетуінен қауіптенген адамдар, сондай-ақ жүкті немесе емізулі баласы бар әйелдер ораза ұстауды кейінге қалдыруына болады. Бұған шариғатымыз рұқсат береді.

Рамазан айының қадірі мен қасиетін терең түсінген ізгілер оразаға алты ай қалған сәттен бастап: «Раббымыз, бізді Рамазан айына аман-есен жеткізе гөр!» – деп дұға жасаған. Сан ғасырдан бері Ислам дінін рухани тірегі еткен халқымыз берекелі Рамазан айын ерекше дайындықпен күтеді. Сауаптар еселеніп жазылатын айда ауызашар беріп, көмекке мұқтаж жандарға пітір садақасын үлестіріп, үлкендердің алғысы мен батасын алуға тырысады. Оразада игі ниетпен орындалатын ізгі амалдар бүгінде салт-дәстүрімізге айналып, ұрпақтан-ұрпаққа жалғасып келеді.

Рамазан – Алла Тағаланың мұсылмандарға берген ұлы сыйы, нығметі. Қасиеті мен шарапаты мол айда күнәларымыздан арылып, сауап жинауға, жан-дүниемізді тазартуға тырысқан абзал. Ардақты Пайғамбарымыз Мұхаммед (оған Алланың салауаты мен сәлемі болсын) өз үмбетін: «Бұл айда жәннат есіктері ашылады. Ораза тұтқан адамның алдыңғы және кейінгі күнәлары кешіріледі», – деп сүйіншілеген.

Рамазанда ауыз бекіткен исі мұсылман баласы өзін ішіп-жеуден ғана шектемей, жаны мен тәнін жамандықтан сақтап, ізгілікке ұмтылады. Іс-әрекетін мұсылманға тән әдеп аясында орындауға тырысады. Өйткені Рамазан – кез келген ізгі амалды риясыз ниетпен жасауға тәрбиелейтін, адамды тақуалыққа үйрететін ай.

Рухани кемелдену айы – Рамазанда барынша әдепсіз әрекет пен қате-кемшіліктен арылуды көздеген адам әдеп білмес жандардың дөрекі әрекеттерін кешіріп, сыпайы түрде «мен оразамын» деп кешірім жолын ұстанады. Кісінің кемшілігіне сабыр ету де – үлкен сауап. Алла Тағала «Шура» сүресінің 43-аятында: «Әрине кім сабыр етіп, кешірімді болса, дау жоқ, істердің ең маңыздысы осы», – деген.

Аштық пен шөлге төзіп, Алла разылығын алуды шынайы ниет еткен адамға берілетін сый мен құрмет ерекше болмақ. Алла Тағала құдси хадисте: «Аузы берік адам ішіп-жеуін Мен үшін доғарды. Ораза – Мен және құлымның арасындағы ғибадат. Оған берілетін сыйды Мен ғана өлшеп, Мен беремін. Аузы берік құлымның аштық пен шөлдеу себебінен шыққан ауыз иісі Мен үшін миск әтірінен де қайырлы», – деген.

Рамазан – Раббымыздың мейірім-махаббатына бөленетін ай. Берекелі, сауабы мол айда Алланың мейіріміне бөленіп, әрбір ізгі амалымыздың жақсылығы еселеніп жазылғай! Еліміз аман, жеріміз тыныш, тәуелсіздігіміз баянды болғай! Жаратушы Жаббар Иеміз келер жылғы ораза айына аман-есен жетуімізді нәсіп еткей! Әмин!

Наурызбай кажы ТАГАНУЛЫ,
Председатель ДУМК, Верховный муфтий

РАМАДАН – МЕСЯЦ ДУХОВНОГО СОВЕРШЕНСТВОВАНИЯ

Искренне поздравляю вас с наступлением священного месяца Рамадан, султаном двенадцати месяцев, которого с нетерпением ждет мусульманская умма! Желаю единства и благополучия, счастья и радости каждой семье! Пусть будет благословенным месяц Рамадан!

Всевышний Аллах повелевает в Священном Коране: «О те, которые уверовали! Вам предписан пост, подобно тому, как он был предписан тем, кто был до вас, чтобы вы стали богобоязненными» (Аль-Бакара, аят 183). Согласно нашему Шариату, пост в месяц Рамадан является обязанностью каждого мусульманина, достигшего половой зрелости и находящегося в здравом уме. Однако путешественники, больные и люди, которые опасаются, что их болезнь ухудшится, а также женщины, которые беременны или кормят детей, могут отложить пост. Наш Шариат это позволяет.

Богобоязненные люди, глубоко осмысливающие ценность и достоинство месяца Рамадан, за шесть месяцев до начала поста обращаются ко Всевышнему со словами: «Всевышний, благополучно приведи нас в месяц Рамадан!». Наш народ, издревле сделавший ислам своей духовной опорой, с особой подготовкой ждет благословенного месяца Рамадан. В месяц умножения наград стараются получить благодарность и благословение старших, раздавая милостыню тем, кто нуждается в помощи. Добрые дела, совершенные с чистыми намерениями, помыслами во время поста, стали нашей традицией и продолжаются из поколения в поколение.

Рамадан – великий дар и благословение Всевышнего Аллаха мусульманам. Лучше постараться избавиться от своих грехов, собрать награды и очистить душу в этом месяце, полном добродетелей и блага. Достопочтенный Пророк Мухаммад (да благословит его Аллах и приветствует) обрадовал свою умму: «В этом месяце откроются врата Рая. Предыдущие и последующие грехи постящегося будут прощены».

В Рамадан мусульманин не только ограничивает себя в еде и питье, а оберегает душу и тело от зла и стремится к духовному очищению и обогащению. Он пытается совершать свои поступки в рамках мусульманской морали. Потому что Рамадан – это месяц, который воспитывает совершать любое доброе дело с бескорыстным намерением и учит человека благочестию.

В Рамадан – месяце духовного совершенствования, человек, который хочет максимально избавиться от безнравственных поступков и ошибок, прощает грубые поступки людей и идет по пути прощения, проявляя максимум выдержки должен произнести: «Я соблюдаю пост». Быть терпеливым к своим недостаткам — тоже великая награда. Всевышний Аллах сказал в 43 аяте суры аш-Шура оповестил: «А если он терпит и прощает, то, воистину, это из дел, требующих решимости».

Особой будет награда и почитание человека, терпящего голод и жажду и имеющего искреннее желание получить довольство Всевышнего. Всевышний Аллах сказал в хадисе Кудси: «Соблюдающий пост, перестал ради Меня есть и пить. Пост — это поклонение между Мной и Моим рабом. Только Я отмерю ему награду и воздам за нее. Запах изо рта постящегося приятнее для меня, чем благоухание мускуса».

Рамадан – месяц милости нашего Создателя. Пусть Всевышний дарует Свою Милость в этот благословенный и вознаграждающий месяц, пусть умножатся добрые дела каждого из нас! Пусть наша страна будет в безопасности, наша земля будет мирной, а наша независимость будет вечной! Да дарует нам Всевышний Джаббар благополучно дойти до священного месяца следующего года! Аминь!

Әулиекөл аудандық «Әмит ишан» мешітінің Бас имамы Нұрбол қажы Балахметов Құсмұрын ауылындағы №28 қазақ орта мектебінде кездесу өткізді.

Аталмыш жүздесуге білім ордасының 8-11 сынып оқушылары қатысып, біраз жайларға қанықты. Онда белгілі дін қайраткері балаларға Отанды сүю, жат ағымдардан сақтану, ата-ананы ардақтау, сапалы білім алу, ұстаздарды сыйлап, құрмет көрсету жайлы насихат айтты.

Ал, жергілікті ауыл молдасы Омар Закарин өз кезегінде дәстүрлі исламның құндылықтарына ден қойып, өскелең ұрпақ өкілдеріне үлгілі де тәртіпті шәкірт атануларына тілектестігін білдірді.

Қостанай облыстық мешітінің баспасөз қызметі

Қасиетті Рамазан айының алдында Сарыкөл аудандық Аққозы мешітінің бас имамы Асылхан Түсіпбек Крылов ауылында болды. Онда ол жергілікті тұрғындармен кездесті.

Дін қайраткері Оразаның ерекшелігін түсіндіре келіп, жиналған қауымға оны ұстау әрбір дені сау азаматқа мұсылмандық парыздың бірі болып табылатындығын тілге тиек етті.

Сондай-ақ басқосуда дін және дәстүр тақырыбында кеңінен уағыз-насихат айтып, қойылған сауалдарға тұшымды жауап берді.

Қостанай облыстық мешітінің баспасөз қызметі

Наурыз мейрамына санаулы күндер ғана қалды. Алайда, оның қарсаңында елімізде көрісу секілді салт-дәстүрлеріміз басталып та кетті.

Меңдіқара аудандық «Зұлқарнайұлы Мұса қажы» мешітінің бас имамы Еркебұлан Қошан жергілікті кітапхана қызметкерлері ұйымдастырған «Амал» мерекесіне қатысты.

Бұл танымдық жағы мол іс-шараға асыл да ақжаулықты аналарымыз бен құрметті меймандар шақырылды. Мұнда бас имам жиналғандарды наурыз мерекесімен шын жүректен құттықтады.

Басқосу барысында қазақтың ежелден келе жатқан жас келіннің бетін ашу, бата беру сынды аса мағыналы да тәрбиелік мәні зор салт-дәстүрлеріміз көрсетілді.

Сонымен қатар екі топқа бөлінген қонақтар арасында қазақ халқының әдет-ғұрпына байланысты викториналық ойындар өткізіліп, жұртшылық таным көкжиегін кеңейтті.

Бас имам Еркебұлан Қошан алдағы Рамазан айына байланысты сауалдарға жауап берді. Қатысушылар мерекеге орай жайылған дастарқандағы наурыз көжеден дәм татты. Аға-буын өкілдері бата жасады.

Қостанай облыстық мешітінің баспасөз қызметі

Жақында Қостанай облыстық «Аймағанбет қажы Спанұлы» мешітінде жылдық жоспарға сәйкес дін қызметкерлерінің білімі мен біліктілігін арттыруға байланысты «Білімді имам- қоғам айнасы» атты курс өткізілді.

Курс бағдарламасына орай алғашқы күні Қазақстан мұсылмандары діни басқармасының өңірдегі оқу ағарту бөліміне жауапты Тимур Туребаев «Құран және тәджуид ережелері» жөнінде, ал облыстық мешіттің істер бойынша білікті маманы Қанат Орынтайұлы концептуалды құжаттар бойынша семинар өткізді.

Келесі күні аталған мешіттің ұстазы Нұрлан Сейдағалиев «Фиқһ» бойынша және «Ихсан және насихат» бөліміне жауапты Абзал Бейсекеев «Ихсан-рухани тәрбие» тақырыбында баяндама жасады.

Екі күндік семинарға өңіріміздегі мешіттердің найб имамдары мен ұстаздары, азаншылары қатысты. Олар білімдері мен біліктіліктерін көтеруге арналған жиыннан көп жайды көңілдеріне түйді.

Қостанай облыстық мешітінің баспасөз қызметі

Сарыкөл ауданының темір жол вокзалында жұмыс істейтін жамағаттарға намаз оқитын орын ауадай қажет еді. Жақында олардың осы тілектері қабыл болып, үлкен қуанышқа кенелді.

Бұл орайда облыстың Бас имамы Бахытбек қажы Тәжімбеттің ұйытқы болғандығын ерекше атап өткеніміз жөн. Жергілікті темір жол вокзалының басшылары дер кезінде қолдау көрсетіп, жанашырлық танытты.

Намазхана мұнда келіп-кетушілерге өте қолайлы. Олардың Бас имам мен қамқорлық көрсеткен азаматтарға деген алғысы шексіз.

Қостанай облыстық мешітінің баспасөз қызметі

Қазақстан мұсылмандары діни басқармасының төрағасы, Бас мүфти Наурызбай қажы Тағанұлы Рамазан айына орай БАҚ өкілдерінің қатысуымен баспасөз мәслихатын өткізді.

ҚМДБ Төрағасы мұсылман үмметі үшін ұлық саналған Рамазан айы жайлы баяндап, журналистердің сұрағына жауап берді.

«Біз Орталық Азия елдерінің мүфтилерімен, ондағы пәтуа саласына жауапты ғалымдармен ақылдаса келе және ғылыми зерттеулер нәтижесін ескеріп, ортақ шешім қабылдадық. Алла қаласа, биыл рамазан айы 23 наурызда басталады. Ал сәуір айының 17-нен 18-не қараған түн – қасиетті Қадір түні. 21 сәуір – ораза айт мерекесі» деді Наурызбай қажы Тағанұлы.

Қостанай қалалық "Жайлаубай ата" мешітінің жас шәкірттері ұстаздары Қазыбекпен бірге "Дін мен дәстүр" бағыты аясында облыстық тарихи-өлкетану мұражайына саяхат жасады.

Жақында ғана өңірімізге республикадан арнайы алдырылған, қазақ жерінде табылған өшпес мұра- "Алтын адам" құнды жәдігерін өз көздерімен көрді. Сонымен қатар тарихи тағылымы мол экспонаттармен танысып, ой-өрістерін кеңейтті.

Шәкірттер Ислам дегеніміз тек мешіт төңірегі ғана емес, ғылым-білім, тарих, мәдениеттің қайнар бұлағы екендігін айқын пайымдады. Аталмыш саяхаттан үлкен әсер алды.

Қостанай облыстық мешітінің баспасөз қызметі

Әулиекөл аудандық «Әмит ишан» мешітінде Бас имам Нұрбол қажы Балахметовтың арнайы шақыруымен рухани кеш болып өтті. Қостанай облыстық мешіті әйел-қыздар секторының жауапты маманы Жансая Салауатқызы жергілікті әйел жамағатымен жүздесті.

Он екі айдың сұлтаны қасиетті Рамазан айында жасалатын сауабы өлшеусіз құлшылықтар, намаз әдебі, ораза талаптары жайлы пайдалы мәліметтер берілді.

Осы басқосуда отбасы құндылықтары төңірегінде уағыз-насихат, Ислам дінінің аясында ананың өмірімізде алар орны, ұлттық тәрбие бағытындағы көкейкесті мәселелер тілге тиек етілді.

Шараға қатысушылар жарқын болашақ және ұлт тағдыры үшін алаңдаушылығын да жасырмады. Қазіргі жаһандану дәуірінде ұлттық құндылықтар мен дәстүрді берік сақтап, оны заманауи үлгіде тұрмыс-салтымызға енгізуді дәріптеу қажеттілігі, отбасылық тәрбие және әйелдің мәртебесі хақында ой салар ұсыныс-пікірлер де қамтыды.

Ақ жаулықты әжелер өздерінің ғұмырлық тәжірибесінен сыр шертіп, жастарға ғибратты ақыл-кеңесін берді. Әулиекөлдің бетке ұстар инабатты келіндері енелерін үлгі тұтып, олардың өздеріне берген тәлім-тәрбиесін аса үлкен ризашылық сезіммен әңгімеледі.

Сондай-ақ, ұстаздар бала тәрбиесі, жүрегі нәзік жандардың шариғат әдебі бойынша киінуі туралы да сөз қозғады. Орамал мұсылман әйелі үшін аса маңызды екендігін еске салды.

Ұлағатты басқосуда Әулиекөлдік аналар қауымы енелер қай мәселеде болсын келіндер мен болашақ отбасын құрайтын аяулы қыздарымызға өнеге көрсетулері қажеттігін де ұмытпады.

Осынау шарада Жансая Салауатқызы бастаған ұстаздар мен аудандағы әйелдер жамағатының бұл кездесуі баршаның жадында ұзақ сақталары хақ. Өйткені, мұнда көпті толғандырып жүрген өзекті жайларға нақты жауап берілді. Облыстан келген сыйлы қонақтарға келелі тақырыпты қозғаған сұхбаттары мен шынайы әңгімелері үшін алғыстарын айтты.

Қостанай облыстық мешітінің баспасөз қызметі

Қарабалық аудандық «Ғашура ана» мешітінің Бас имамы Серік Рахым ЖАНТ бойынша Федоров ауданында болды. Алдымен жергілікті аурухана мамандарымен «Ислам және ізгі қоғам» тақырыбында сөз қозғап, кеңінен түсініктеме берді.

Одан кейін аудандық төтенше жағдайлар бөлімі қызметкерлерімен кездесіп, «Дәстүрлі ислам, теріс ағымдардың қателігі», «Ислам және ізгі қоғам» мәселесіне байланысты әңгіме өрбітті.

Сондай-ақ, сол аудандағы «Жиентай қажы» мешітінде қасиетті жұма күнгі намазға қатысып, тағылымы мол уағыз айтты.

Қостанай облыстық мешітінің баспасөз қызметі