Астанада өтіп жатқан Әлемдік және дәстүрлі діндер лидерлерінің VIII съезі аясында Қазақстан мұсылмандары діни басқармасының төрағасы, Бас мүфти Наурызбай қажы Тағанұлы мен әл-Азһар шейхы, Жоғарғы имам Ахмет Тайыптың орынбасары, профессор, доктор Мұхаммед Абдурахман Әл-Дуайни Ислам әлемінің көрнекті ғұламасы, шейх Ахмет Тайыптың «Ислам дініндегі негізгі ұстанымдар» атты еңбегінің тұсаукесеріне қатысты.

Бас мүфти Наурызбай қажы Тағанұлы кітаптың маңызына тоқталып: «Бұл еңбекте сенім, құлшылық және көркем мінез қағидалары жүйелі түрде түсіндірілген. Ол дін қызметкерлері үшін уағыз-насихат пен діни оңалту бағытындағы маңызды құрал болмақ. Сонымен қатар, медресе шәкірттері мен жастардың имандылығын арттыруға, рухани дүниесін байытуға септігін тигізеді деп сенеміз», – деді.

Іс-шараға әл-Азһар шейхы, Жоғарғы имам Ахмет Тайыптың орынбасары, профессор, доктор Мұхаммед Абдурахман Әл-Дуайни, Мұсылман Ақсақалдар Кеңесінің Бас хатшысы Мұхаммед Абдельсалам, ҚР Парламенті Сенатының депутаты, Мұсылман ақсақалдар кеңесі Орталық Азия кеңсесінің бас үйлестірушісі Дархан Қыдырәлі, сондай-ақ ҚМДБ Ақсақалдар кеңесі мүшесі Жабал Ерғалиев пен Діни басқарма өкілдері қатысты.

Бұл туынды ислам ғылымының тереңдігін айқындап көрсететін рухани тәрбие құралы ретінде бағаланады.

Дереккөз: ҚМДБ ТӨРАҒАСЫ МЕН ӘЛ-АЗҺАР ШЕЙХЫНЫҢ ОРЫНБАСАРЫ ДІНИ ЕҢБЕКТІҢ ТҰСАУКЕСЕРІНЕ ҚАТЫСТЫ , Muftyat.kz

Қазақстан мұсылмандары діни басқармасының жанындағы "Darhan Dala" жобасы аясында Қостанай облысындағы Жангелдин және Арқалық аудандарының жамағаттары Алаш ардақтысы Міржақып Дулатұлы мен Кейкі батырдың кесенесіне зиярат жасады. Онда ұлы тұлғалардың рухына Құран бағышталды.

Мешіттердің Бас имамдары жұртшылыққа кесенелерді таныстырып, зиярат етудің әдебі жөнінде уағыз- насихат жүргізді.

Қостанай облыстық мешітінің баспасөз қызметі

Бүгін Астанада өтіп жатқан Әлемдік және дәстүрлі діндер лидерлерінің VIII съезі аясында Қазақстан мұсылмандары діни басқармасының төрағасы, Бас мүфти Наурызбай қажы Тағанұлы «Сенім экстремизмге қарсы: діндердің бітімгерлік әлеуеті» тақырыбындағы төртінші секция отырысында баяндама жасады.

Өз сөзінде Бас мүфти еліміздегі бейбітшілік дәстүрінің маңызын атап өтіп: «Бірлік пен бейбітшіліктің алтын бесігіне айналған еліміз тұрақты түрде Әлемдік және дәстүрлі діндер лидерлері съезін өткізіп келеді. Мемлекет басшысы қадірлі Қасым-Жомарт Кемелұлы бір сөзінде: «Бұл форумды өткізуге Қазақстанның бастамашылық етуі бекер емес. Себебі қазақ жері ғасырлар бойы Батыс пен Шығыстың арасындағы көпір болып келеді. Осында, яғни Ұлы дала төрінде небір алып көшпелі империялар өмір сүрген. Діни ұстамдылық – олардың бәріне ортақ сипат. Съездің өткізілуі – еліміз бен бүкіл әлемде диалог пен ынтымақтастықты нығайтуды көздейтін Қазақстан саясатының маңызды бағыты», – деп атап өткен еді», – деді.

Сонымен қатар, Наурызбай қажы Тағанұлы: «Расында бұған дейінгі форумдарда қабылданған декларацияларда қандай идеялардың атын жамылғанына қарамастан радикализм, зорлық-зомбылық пен қақтығыстар әрдайым сынға алынды. Қазіргі күрделі жағдайда діни көшбасшылардың бір үстел басына отырып, кез келген қайшылықты еңсеретін ізгі амалдың үлгісін күллі әлемге көрсетуі аса маңызды», – деп ой түйді.

Басқосу барысында Сауд Арабиясынан Ислам ынтымақтастығы ұйымы Бас хатшысының орынбасары доктор Юсеф Мұхаммед Әлдубай, Финляндия Эвангелиялық-лютеран шіркеуінің примасы Тапио Юхани Луома, Франция Сыртқы істер министрлігінің дін істері жөніндегі кеңесшісі Жан-Кристоф Пооссель, Еуропалық мұсылман көшбасшылары кеңесінің төрағасы имам Яхья Паллавичини, АҚШ-тағы Еуразиялық еврейлерді қолдау ұлттық коалициясының жетекшісі Марк Левин, Қазақстан стратегиялық зерттеулер институтының сарапшысы Елнар Берікбаев және Чехия Республикасының Сыртқы істер министрлігінің арнайы өкілі Роберт Ржегак баяндама жасады.

Дереккөз: БАС МҮФТИ СЪЕЗД АЯСЫНДА «СЕНІМ ЭКСТРЕМИЗМГЕ ҚАРСЫ: ДІНДЕРДІҢ БІТІМГЕРЛІК ӘЛЕУЕТІ» ТАҚЫРЫБЫНДА БАЯНДАМА ЖАСАДЫ , Muftyat.kz

Астана қаласында Әлемдік және дәстүрлі діндер лидерлерінің VIII съезі аясында Қазақстан мұсылмандары діни басқармасының төрағасы, Бас мүфти Наурызбай қажы Тағанұлы мен Индонезия Ғұламалар Кеңесі төрағасының орынбасары Әнуар Аббас екіжақты ынтымақтастық жөніндегі меморандумға қол қойды.

Кездесу барысында тараптар құжаттың өзара ынтымақтастықты арттыруға бағытталғанын атап өтіп, бейбітшілікті ілгерілету мен «Ихсан» ілімі аясындағы серіктестікті кеңейтуге ниетті екендіктерін білдірді.

Сондай-ақ келіссөздерде радикализмнің алдын алу, пәтуа және шариғат саласында тәжірибе алмасу, өркениетаралық диалогты дамыту, жасанды интеллектті пайдалана отырып ислам құндылықтарын насихаттау мәселелері қаралды.

Меморандум қазақ, индонезия және ағылшын тілдерінде әзірленді.

Дереккөз: ҚМДБ МЕН ИНДОНЕЗИЯ ҒҰЛАМАЛАР КЕҢЕСІ ЫНТЫМАҚТАСТЫҚ ТУРАЛЫ МЕМОРАНДУМҒА ҚОЛ ҚОЙДЫ , Muftyat.kz

Қостанай қалалық "Жайлаубай ата" мешітінің әйел-қыздар ұстазы Аяулым Ермекқызы "Адамзаттың асыл тәжі" атты мәуліт мерекесін өткізді.

Онда Алланың кәләмі Құран оқылып, Пайғамбарымыз Мұхаммедтің құрметіне салауат пен оның өнегелі өмірі жайлы уағыздар айтылды.Сондай-ақ, "Пайғамбарға сағыныш хаты" атты хат жазудан жарыс ұйымдастырылды.Сайыстың қорытындысы бойынша жамағаттың арасынан Гульсира Ким бірінші орынды иеленді. Мәуліт мерекесіне атсалысқан барлық азаматтарға Алла сауаптан жазсын!

Әлемдік және дәстүрлі діндер көшбасшыларының VIII съезі аясында Қазақстан мұсылмандары діни басқармасының төрағасы, Бас мүфти Наурызбай қажы Тағанұлы Білім, ғылым және мәдениет жөніндегі Ислам ұйымының (ICESCO) бас директоры Салим бин Мұхаммед әл-Малик мырзамен ресми кездесу өткізді.

Кездесу барысында білім мен ғылым саласындағы ынтымақтастық, мәдени мұраны сақтау және рухани құндылықтарды дәріптеу мәселелері талқыланды. Сондай-ақ ислам әлеміндегі бірлік пен өзара түсіністікті нығайтудың маңызы атап өтілді.

Дереккөз: СЪЕЗД АЯСЫНДА БАС МҮФТИ ICESCO БАСШЫСЫМЕН КЕЗДЕСТІ , Muftyat.kz

Хадистердің бірінде "Тазалық- иманның жартысы' делінген. Түсінген адамға бұл даналық сөздің астарында үлкен мән жатыр.

Жуырда Қостанай облыстық "Аймағанбет қажы Спанұлы" мешітінің іші-сыртына тазалық жұмыстары жүргізілді. Оған барлық имамдар мен мешіт қызметкерлері белсене атсалысты.

Қостанай облыстық мешітінің баспасөз қызметі

Әлемдік және дәстүрлі діндер лидерлерінің VIII съезі аясында Қазақстан мұсылмандары діни басқармасының төрағасы, Бас мүфти Наурызбай қажы Тағанұлы Бахрейн Корольдігінің Ислам істері жөніндегі Жоғары кеңестің төрағасы Абдурахман бен Мұхаммад бен Рашид Әл-Халифа мен Ислам істері жөніндегі Жоғары кеңес Төрағасы кеңсесінің директоры Саид Мұхаммад Жалал Абдулла Абдурахим мырзаларды қабылдады.

Кездесу барысында тараптар Қазақстан мен Бахрейн арасындағы діни-рухани байланыстарды дамыту, ислам құндылықтарын насихаттау және өзара тәжірибе алмасу мәселелерін талқылады.

Мәртебелі меймандар Қазақстанда дәстүрлі діндер көшбасшылары съезінің өтуін әлемдік деңгейдегі маңызды бастама екенін атап өтті.

Басқосу соңында Бас мүфти Рашид Әл-Халифаға ілтипат көрсетіп, сый-сияпат тарту етті.

Дереккөз: ҚМДБ ТӨРАҒАСЫ БАХРЕЙН КОРОЛЬДІГІНІҢ ДЕЛЕГАЦИЯСЫН ҚАБЫЛДАДЫ , Muftyat.kz

Әлемдік және дәстүрлі діндер лидерлерінің VIII съезі аясында Қазақстан мұсылмандары діни басқармасының төрағасы, Бас мүфти Наурызбай қажы Тағанұлы Мәскеу және Бүкіл Русь Патриархы Кириллмен кездесті.

Кездесуде дінаралық татулықты нығайту және қоғамда рухани құндылықтарды дәріптеу мәселелері сөз болды.

Кездесу соңында тараптар Съездің қазіргі замандағы диалог пен бейбітшілікке қосып отырған үлесінің маңыздылығын атап өтті.

Дереккөз: БАС МҮФТИ МӘСКЕУ ЖӘНЕ БҮКІЛ РУСЬ ПАТРИАРХЫ КИРИЛЛМЕН КЕЗДЕСТІ , Muftyat.kz

Бүгін елордадағы Тәуелсіздік сарайында Мемлекет басшысы Қасым-Жомарт Кемелұлы Тоқаевтың төрағалығымен Әлемдік және дәстүрлі діндер көшбасшыларының VIII съезі өз жұмысын бастады.

Биылғы форумның тақырыбы – «Діндер диалогы: болашақ жолындағы синергия». Съезге әлемнің 60-тан астам елінен 100-ден аса делегация, оның ішінде түрлі діндер мен халықаралық ұйымдардың беделді өкілдері қатысуда.

«Қазір жер жүзінде сын-қатерлер көбейіп, халықаралық ахуал ушығып тұр. Соның салдарынан түрлі қақтығыстар көбеюде. Алмағайып кезең ешкімге оңай болып жатқан жоқ. Өкінішке қарай, соғыстың сипаты мен болмысы белең алуда. Дегенмен біз өткен заманнан дұрыс сабақ алып, сындарлы әрі ашық келіссөздерге ұмтылуымыз керек. Мәмілеге балама жоқ. Бұл тұрғыдан алғанда, бүгінгі Съездің мән-маңызы айрықша. Дін басшыларын гуманистік көзқарастарды ту еткен Бейбітшілік елшілері деп айтуға болады. Сіздер ортақ мүдде үшін бірігіп, әлем жұртшылығын игі мақсат жолында жұмылдыруға ниет білдіріп отырсыздар. Баршаңызға шынайы ризашылығымды білдіремін», – деді Президент Қасым-Жомарт Тоқаев өз сөзінде.

Съезд жұмысына Қазақстан мұсылмандары діни басқармасының төрағасы, Бас мүфти Наурызбай қажы Тағанұлы да қатысуда.

Айта кетейік, VIII съезд екі күнге жалғасып, пленарлық және секциялық отырыстар форматында өтеді.

Дереккөз: АСТАНАДА ӘЛЕМДІК ЖӘНЕ ДӘСТҮРЛІ ДІНДЕР КӨШБАСШЫЛАРЫНЫҢ VIII СЪЕЗІ БАСТАЛДЫ , Muftyat.kz