«Айта-айта Алтайды, Жамал апам қартайды» - демекші, қаралы үйдегі жаназа, құдайы ас-садақаның дастарқанына қа¬тыс¬ты мәселенің айтылып келе жатқанына қаншама уақыт өтті. Әйтсе де бұл өзекті жайға әлі де толыққанды бойұсынбай келеміз.
Мен бүгін осы ой-толғанысым арқылы жаназа рәсіміндегі ысырапшылдық жөніндегі пікірімді өздеріңізбен бөлісуді жөн көрдім.
Бі¬реудің қимас жақыны өмірден өтіп, қайғы жамылып отырса да аста-төк дастарқан жайып, марқұм үшін сауап жинауды емес, адамдар алдындағы мақтанышты ойлаумен әлекпіз. Соның салдарынан ысырапшылыққа жол береміз.
Қазір бәрі де бәсекеге айналғаны жасырын емес. Біреу бі¬реуден қалып бара жатса, қарызданып, тіпті несие алатындарға таң қалмайтын болдық. Ал, осындай қаржыға берілген құдайы астың сауабы бар ма?...
Қайғыға батып, қара жамылған отбасы, олар өздерін жұбата ма, әлде өзгенің ас ішіп, аяқ босатуына алаңдай ма? Қазан-қазан ет асылып, қатар-қатар дастарқан жайылады. Сонда көпшілік ол шаңыраққа көңіл айтуға емес, көз сүріндірер дастарқаннан тамақ ішу үшін ғана бара ма? Жанашыр туысы, ет жақын бауырынан айырылып, жаны қиналып отырғанда бәсекеге талпынудың қажеті қанша?
Асыл дінімізде ысырапқа жол берілмейді. Құранда: «..анығында Алла ысырап етушілерді жақсы көрмейді» (Ағраф сүресі, 31 аят)-делінсе, Ардақты пайғамбарымыз: «Ішіңдер, жеңдер, киініңдер және садақа беріңдер. Алайда ысырапшылық пен тәкаппарлықтан сақтаныңдар». (Ахмад. Мухтар «ӘлАхадис»111)-деп ескертеді.
Көтеріліп отырған маңызды мәселеге байланысты Қазақстан мұсылмандары діни басқармасы «Жаназа және жерлеу рәсімдері» деп аталатын кітапты даярлап, онда құдайы ас беру тәртібі нақтыланған болатын.
Берері мол еңбектегі пәтуалар ысырапқа жол бер¬меу¬ге негізделіп, қарапайым халықтың босқа шашылмауына бағытталған. Осы пәтуаға орай, 2018 жылдың наурыз айында Қостанай қаласында орталық мешітте облыстың Бас имамы Бахытбек қажы Нұрғабылұлының басшылығымен келелі жиын өтіп, арнайы шешім де қабылданған еді.
Оған кейбіреулер түсіністікпен қараса, енді өңірдегі кейбір аудандардағы қандастарымыз әлі де болса немқұрайдылық танытуда. Мұның ішінде Қостанай шаһары да бар екендігі белгілі. Өмірден көріп, біліп жүргеніміздей, жаназа-құдайы астың ас мә¬зірі кәдімгі тойда жайылатын тағамдардан кем түспейді.
Жаназа дастарқаны барлық пен байлықты көрсетер, бәсеке-мақтаныштың орны емес қой. Негізінде марқұмның артынан сауапты, өнегелі іс жасалғаны дұрыс. Біз болсақ, тек атақ-абыройды ғана ойлап кеттік. Соның салдарынан қарызданып-қауғаланып, кейін сол алғандарын қайтара алмай, қиналып жүрген отбасылар да жоқ емес. Міне, осы жалған намысқа салынуға тоқтау қоятын кез жетті.
Адам бар жерде қаза бар. Ол өмір заңдылығы. Өлім бардың малын шашады, жоқтың артын ашады деген де бар. Әр шаңырақтың тұрмыс жағдайы да әр-түрлі. Сондықтан, көрпемізге қарай көсілген абзал. Мұны әсіресе, жастардың саналарына сіңіре білсек, құба-құп.
Қадірлі ағайын! Ысырапқа жол беру – өркениетке де, мәдениетке де, асыл дініміздің шариғи талаптары мен ұлттық салт-дәстүрімізге де қайшы келетінін ұмытпайық.
Алланың берген ырыздық-несібесін сауапты игі істерге жұмсап, астамшылыққа ұрынбау маңызды міндет. Имам Ағзам Әбу Ханифа: «Өз орнымен жұмсалған шығын ысырапқа жатпайды, ал ысырап еш уақытта жақсы нәтиже бермейді»-дегені баршамызға сабақ болғаны жөн. Осыны баршамыз дұрыс түсінейік, ағайын!
Бектұрсын Торғайбайұлы, «Марал ишан» мешітінің Бас имамы
Ұзынкөл аудандық «Балықты» мешітінің Бас имамы Есенкелді қажы Сақтағанұлы жергілікті кітапханада «Кітап сыйлау» күніне орай оқырмандарға рухани жағынан берері зор тағылымды кездесу ұйымдастырды.
Жиында аталмыш кітапхана ұжымына «Дін мен дәстүр» және «Религия и традиция»" атты қос кітап тарту етілді. Мәдениет саласының өкілдеріне аталған құнды еңбектің терең мәні мен мазмұны жан-жақты түсіндірілді.
Жүздесудің соңында кітапхана қызметкерлері Бас имамға мұндай игі шаралардың жұртшылыққа тигізер әсері ерекше екендігін айта келіп, шын жүректен шыққан шынайы алғыстарын білдірді.
Қостанай облыстық мешітінің баспасөз қызметі
Жақында Арқалық қалалық «Мухтасиб Әлмұхаммед» мешітінің ұстазы Бақытбек Мешітбаев жергілікті полиция басқармасы кадр саясаты тобынын аға инспектор – психологы, майор Гүлбаршын Мирашқызының ұйымдастыруымен тәрбиелік маңызы жоғары кездесу өткізді.
Онда көптің көкейінде жүрген «Суицид және оның алдын алу» жайы әңгіме өзегіне айналды. Жиында қоғамдық тәртіп сақшылары өздерін толғандырған сауалдарын қойып, тиянақты жауап алды.
Қостанай облыстық мешітінің баспасөз қызметі
Жақында Қостанай қалалық «Жайлаубай ата» мешітінде Ережеп айының құрметіне жамағатқа ауызашар берілді. Бұл орайда намазхандар үйымшылдық танытып, берекелі дастарханнан дәм татты. Соңында найб имам Бақберсін жиналғандарға уағыз-насихат айтты.
Бас қосқан ағайындар зілзаладан зардап шеккен түрік бауырларымыздың қайғысына шын мәнінде қайғырып, қабырғалары қайысатындықтарын білдірді.
Сонымен қатар жоғарыда аталған мешіт жамағаты қасиетті жұма күніне байланысты намазхандарға қайырымдылық жасап, ыстық тамақ таратты. Жомарттық танытқан азаматқа көпшілік ризашылықтарын көрсетіп, дұға оқыды.
Қостанай облыстық мешітінің баспасөз қызметі
Жуырда Қостанай аудандық «Маңдай батыр» мешітінің бас имамы Дархан Манарбекұлы мен найб имам Азамат Мурзаканов аталмыш ауданға қарасты Мәскеу ауылында болды.
Олар жергілікті жұртшылықпен кездесіп, «Ислам және ізгі қоғам» тақырыбында әңгіме өрбітіп, насихат айтты. Қатысушылардың көкейінде жүрген сауалдарына нақты жауап берді.
Дін қайраткерлерінің ой-толғамдары көңілінен шыққан тұрғындар дән риза болысып, шынайы алғыстарын жеткізді.
Қостанай облыстық мешітінің баспасөз қызметі
Биылғы «Ислам және ізгі қоғам» жылы аясында Қостанай облысының жастар ісі секторының тапсырмасы аясында Жітіқара аудандық "Ержан Тәтішев" мешіті жамағаты арасында стол теннисінен турнир өткізілді.
Оған 15 адам қатысып, бақтарын сынады. Жарыс нәтижесі бойынша бірінші орынды Мәлік Тулубаев, екінші орынды Азамат Елбаев, үшінші орынды Азамат Бекежанов жеңіп алды.
Турнир жүлдегерлеріне марапат қағаздары мен бағалы сыйлықтар тапсырылып, лайықты құрмет көрсетілді.
Қостанай облыстық мешітінің баспасөз қызметі
Қостанай қалалық «Жайлаубай ата» мешітінің ұжымы әрдайым жамағатқа берері мол тағылымды кештерді ұйымдастыруға айрықша көңіл бөледі. Осы жуырда ғана имандылық ордасында Ережеп айының құрметіне «Бай дүйсенбі» деп аталатын жиын өткізілді.
Онда дастархан жайылып, қатысушыларға ауыз ашар берілді. Басқосуға арнайы шақырылған «Марал ишан» мешітінің Бас имамы Бектұрсын қажы Торғайбайұлы және найб имам Нұрлыбек уағыз-насихат айтты. Көпшілік оны ұйып тыңдады. Жамағат құптан намазын оқыды.
Өңіріміздегі мешіттердің арасындағы сыйластық пен құрметке құрылған мұндай тәрбиелік мәні зор кездесулер алдағы уақытта да жалғасын табады деген үміттеміз.
Қостанай облыстық мешітінің баспасөз қызметі
Қостанай облыстық әйел-қыздар секторынын ұйымдастыруымен облысымызда әйел жамағаттың қатысуымен «Қош келдің мұсылман сіңілім» атты рухани танымдық кеш болып өтті.
Оның басты мақсаты – жүрегі нәзік әйел қауымына олар басына тағатын орамалдың қадір-қасиетін түсіндіру. Жиында ол жайында тағылымы мол уағыз-насихат айтылып, танымдық бейнебаяндар көрсетілді.
Жамағаттар бір-біріне сый-сияпат ұсынып, дастарқан басында мазмұнды әңгіме өрбіді. Қатысушылар ұмытылмас әсер алды. Рухани кештің жоғары деңгейде өтуіне облыстық мешіттің әйел-қыздар секторының меңгерушісі Жансая Халим мен қалалық «Жайлаубай ата» мешітінің ұстазы Сәуле Дүйсеке атсалысты.
Қостанай облыстық мешітінің баспасөз қызметі
Лисаков қалалық «Әбдіхаим Саламатұлы» мешітінің жаңадан тағайындалған бас имамы жауапты қызметіне кірісті.
Бас имам бесін намазынан кейін үстіміздегі «Ислам және ізгі қоғам» жылына байланысты ауызбірлік, ынтымақ жайында тағылымы мол уағыз айтты.
Жиында имандылық ордасының жанашырлары болып табылатын алқа мүшелерін сайлады. Бас имам жұмысты жандандыру мақсатында қатысушыларға алдағы тұрған маңызды міндеттер жайлы баяндады. Шешімін күтіп тұрған мәселенің бірі - мешіт жанынан мәйіт сақтайтын арнайы орын керектігіне тоқталды.
Шаһардағы 90 жастағы абыз ақсақал Сәндібек Шаяхметов Әкімбек Нұрханұлына және алқа мүшелеріне ізгі тілегін білдіріп, ақ батасын берді.
Қостанай облыстық мешітінің баспасөз қызметі
Миләди
Хижри
