Өткен жұмада Қостанай қалалық «Жайлаубай ата» және «Рудный қасының Нұр» мешіттерінде қасиетті Жұма намаздан соң қайырымдылық шарасы ұйымдастырылды.

Осы «Жомарт жұма» атауымен өткізілген жиында арнайы аспаздың ерекше дәмді палауы дайындалып, көпшілікке таратылды.

Қасиетті күн жұртшылықтың есінде ұзақ сақталары сөзсіз.

Қостанай облыстық мешітінің баспасөз қызметі

Жуырда Науырзым ауданының ақсақалдары Арқалық қаласына сапармен келді. Олар, алдымен, Бас мүфтидің бастамасымен қолға алынған «Дархан дала», яғни еліміздегі аты алты алашқа мәшһүр болған батырлар мен әулие, ишандардың басына зиярат жасау жобасы аясында «Кейкі батыр» кесенесіне ат басын бұрды. Онда Кейкі батырдың рухына бағышталып Құран оқылды.

Аға буын өкілдерін Арқалық қаласының әкімі Әмірхан Асанов бастаған азаматтармен ел ардақтылары № 4 Кейкі батыр қазақ мектебінде салтанатты түрде қарсы алды.

Алыстан ат терлетіп келген қарияларға дастарқан жайылды. Мәртебелі қонақтар содан кейін «Домбыра күніне» арнайы ұйымдастырылған іс-шараға қатысты.

Сондай-ақ, ұлт ұстазы Ахмет Байтұрсыновтың 150 жылдық мерейтойының құрметіне ашылған саябақты аралап, Арқалық шаһарында қайта бой көтерген «Тері өндеу» зауытында болып, жасалып жатқан игі істермен танысты.
Әлемдік «Гиннес рекордтар» кітабына еңген «1000 домбыра» жобасы аталған қалада өз жалғасын тапты. Бір күндік сапар науырзымдық қариялардың көңілдерінен шықты. Осы іс-шараға мұрындық болған шаһар басшысыӘмірхан Асановқа, қадірменді ақсақал Тумырза Қоржынбаевқа шынайы алғыстарын білдірді.

Қостанай облыстық мешітінің баспасөз қызметі

Әңгімеге арқау болған Меңдіқара аудандық «Зұлқарнайұлы Мұса қажы» мешітінің қызметкерлері Құрбан айт мерекесіне жан-жақты дайындық жасады. Мәселен, алғашқы күні таңертеңгі айт намазынан кейін жергілікті әкімдік қызметкерлері құрбандыққа 1ірі қара мал және «Олжа» жауапкершілігі шектеулі серіктестігі 5 қой шалды. Басқа да азаматтар жомарттық танытты.

Сойылған еттер жергілікті 38 көмекке мұқтаж көпбалалы отбасылар мен әлеуметтік жағынан азқамтылған жандар мен жалғызбасты аналарға таратылып берілді.

Сондай ақ мешітте «Жаздық діни сауат ашу» курсында оқып жатқан шәкірттерге «Айт сыйлығы» тарқатылып берілді. Балалар айт сыйлығын алып мәре-сәре қуанысып қалды. Айт мерекесімен құттықтаған ұстаздарына алғыстарын айтты.

Қостанай облыстық мешітінің баспасөз қызметі

Арқалық қалалық «Мухтасиб Әлмұхаммед» мешітінің ұжымы қасиетті Құрбан айт мерекесін есте қаларлықтай өткізді. Таңғы айт намазынан кейін арнайы мал союға белгіленген санитарлық тазалыққа сай «Торғай–Ет» жауапкершілігі шектеулі серіктестігінің комбинатында тұрғындар құрбандық малдарын шалды.

Одан кейін «Жігер» стадионында аталған мерекеге арналған рухани кеш ұйымдастырылып, онда қала әкімі Әмірхан Біркенұлы жиналған қауымды ерекше мерекемен құттықтады.

Құрбан айт мейрамына орай спорттың сегіз түрінен жарыс өткізілді. Жарыста үздік шыққандарға қаламыздың бас имамы Нұрханқажы Асанұлы бағалы сыйлықтармен дипломдарды табыс етті.

Басқосуда 100 балаға қайырымдылық мақсатында сый-сыяпат көрсетілді. Сайыс аяқталған соң мерекелік дастархан жайылды.

Сондай-ақ, Арқалық қаласына қарасты Фурманов ауылындағы «Тәубе» намазханасында да Құрбан айт мерекесі жоғары деңгейде өткенін тілге тиек еткен жөн.

Қостанай облыстық мешітінің баспасөз қызметі

Жер бетіндегі күллі мұсылмандардың айтулы Құрбан айт «Мейірім мерекесі» болып табылады. Сондықтан белгілі дін қайраткері Бахытбек қажы Тәжімбет басқаратын өкілдік қызметкерлері оған жан-жақты дайындалды.

Әсіресе, қайырымдылыққа айрықша назар аударылды. Қостанай облыстық, Қостанай қалалық және Қостанай аудандық мешіттері бірігіп, 400 қолдауға мұқтаж отбасыға ет үлестірілді.

Оның ішінде 200 көмекке зәру отбасы Қостанай облыстық мешітіне, 168-і Қостанай қалалық мешітіне, ал 32-і мұқтажы Қостанай аудандық мешітіне келіп тіркелді.

Таратыңқырап айтатын болсақ, мереке күндері QURBAN2022.KZ сайты арқылы 15 онлайн түрінде мал шалынып, ет 75 отбасыға табыс етілді. Сонымен қатар23 қой және 2 ешкі офлайн түрінде сойылып, 200 отбасыға таратылды.

Жалпы, құрбандыққа шалынған ұсақ малдың саны 40-ты құрады. Әрқайсысының салмағы 30-35 келіден. Сойылған ірі қара 9. Сиырлардың салмағы 200-210 келі тартты.

Онлайн түрінде сойылған малдың еттері 150 отбасыға үлестірілді. Ал 1 офлайн түрінде шалынған малдың еті 50 отбасыға таратылды.

Тоқсан ауыз сөздің тобықтай түйініне келсек, облыстық мешіт қызметкерлері өз міндеттеріне аса жауапкершілікпен қарап, қасиетті Құрбан айт мерекесін ұйымшылдықпен әрі есте қаларлықтай деңгейде өткізді. Шын мәнінде халықтың ыстық ықыласына бөленіп, олардың шынайы алғыстарына бөленді.

Қостанай облыстық мешітінің баспасөз қызметі

Қостанай облыстық мешітінің жанында «Құрбандық-2022» жобасын жүзеге асыру үшін арнайы штаб құрылды. Оған жауапты ретінде жаста болса іскерлігімен танылып үлгерген Әлішер Ертайұлы бекітілді.

Бұл штаб құрамындағы дін қызметкерлері биылғы құрбан айтта өңірде атқарылатын жұмыстарды алдын ала пысықтап, нақтылады. Көпшілік хабарландырылды.

Осы шарлар туралы обыстық «Қостанай» телеарнасында тікелей эфирде екі тілде брифинг болып, Икрам Бақытжан мен Мурзаканов Азамат журналистерге арнайы сұхбат берді.

Баршаға мәлім, осынау үлкен айтта түйе, ірі қара, қой және ешкі құрбандыққа шалынады. Сондықтан ниет еткен қауымға ыңғайлы болу үшін Қазақстан мұсылмандары діни басқармасының «Халал Даму» сертификатын алған «ҚостанайАгроПродукт» қасапханасы, «Амиго» кешені таңдап алынды.

Сонымен қатар 9 шілде күні Қостанай облысы бойынша барылық мешіттерде саған 7:30 «Құрбан айт» намазы оқылады! Содан кейін барып құрбандық шалу рәсімі басталады.

Қостанай облыстық мешітінің баспасөз қызметі

Қостанай облыстық мешітінің жанындағы Зекет және қайырымдылық қорының жұмысы барынша жандана түсуде. Сөзіміз нақты болуы үшін бір мысал келтіре кетелік.

Мәселен, өткен маусым айында өңір бойынша 45 қайырымдылық іс-шарасы өткізілді. Онда 1010 қолдауға мұқтаж отбасына көмек көрсетілді. Осы мақсатқа 54 млн 623 мың 500 теңге жұмсалды.

Аталмыш қордың жетекшісі әрі наиб имам Бақытжан қажы Икрамның айтуына қарағанда, облыстағы кәсіпкерлер және басқа да жаны жомарт, жанашыр азаматтар өздерінің лайықты үлестерін қосуда.

Қостанай облыстық мешітінің баспасөз қызметі

9 шілде – Құрбан айт болып бекітілгенін Қазақстан мұсылмандары діни басқармасының төрағасы Наурызбай қажы Тағанұлы айтып өтті.

«Һижри жыл санауы бойынша 1443 жылдың зұлхижжа айының басталуы 30 маусым болып бекітілді. Ал арапа күні 8 шілдеге сәйкес келеді. 9 шілде – Құрбан айт мерекесінің бірінші күні.

Осы Зұлхижжа айының алғашқы он күнінде барынша ықыласпен ғибадат етіп, көбірек ізгі істер мен жақсы амалдар жасауға тырысу керек. Өйткені, хадистерде сол уақытта орындалған игі істердің сауабы еселеніп жазылатыны айтылған.

Ал арапа күні ораза тұту – сүннет. Ардақты Пайғамбарымыз Мұхаммед (оған Алланың салауаты мен сәлемі болсын): «Арапа күні ораза ұстау арқылы Алладан өткен және келесі жылдың күнәсін кешіруді үміт етемін», – деген.

Құрбан айт намазынан кейін үш күн ішінде жағдайы келген мұсылманға құрбандық шалу – міндет. Алла Тағала қасиетті Құранда: «Раббыңның разылығы үшін намаз оқы және құрбандық шал» («Кәусар» сүресі, 2-аят) деп бұйырған.

Қостанай облысы бойынша барлық мешіттерде сағат таңертенгі 7:30 да Қрбан айт намазы оқылады.

Соынмен қатар құрбан шалу рәсімін қашықтан өткізуге арналған qurban2022.kz сайты іске қосылды. Ол жерде егер Қостанай облысында сіздің атыңыздан құрбандық шалынуын қаласаңыз осы сайт арқылы тапсырыс беруге болады.

Сіздің тапсырсыңыз орындалғаны туралы толық ақпарат жеке өзіңізге әлеуметтік желі арқылы видео таспағатүсіріліп жіберілетін болады.

Қостанай қаласында Федоров тас жолы бойынында «Амиго» кешенінде Құрбандық шалуға толық жағдай жасалған. Ол жерде арнайы қасапшылар қойылады.

Қазіргі уақытта бағалар бойынша шамамен сыйыр 420 000, қой 80 000 аралығында деп ұсынуда. Бұл жерде айта кету керек сыйыр 7 адам атынан ал қой бір адам атынан шалынатын болады.

Алла Тағала елімізге амандық, жұртымызға тыныштық бергей. Ізгі ниетпен шалатын құрбандығымыз, қажылық сапарында жүрген жерлестеріміздің қажылығы қабыл болғай. Әмин!» Бахытбек қажы Нұрғабылұлы.

Қостанай облыстық мешітінің баспасөз қызметі

Арқалық қалалық «Мухтасиб Әлмұхаммед» мешітінің ұстазы Арлан Бауыржанұлы «Алюминстрой» мекемесінің ұжымы және Шоқан Уәлиханов атындағы №1 мектеп мұғалімдерімен жат ағымның алдын алу мақсатында кездесу өткізді.

Жүздесу барысында түрлі сұрақтар қойылып, оларға тұшымды да нақты жауап берілді. Жиын соңында қатысушылар мешіт ұстазына мағыналы да мәнді әңгімелері үшін шынайы алғыстарын білдірді.

Қостанай облыстық мешітінің баспасөз қызметі

Қазақстан мұсылмандары діни басқармасы жанындағы «Уақып» қазақстандық қоры» корпоративтік қайырымдылық қорының президенті Ардақ Нүсіпханұлы Оразбаев және «Qamqor-Sharapat» орталығы директоры Рысымов Мирамбек Қаблбекұлы Қостанай облысына сапарында қала, аудан Бас иамдарымен кездесу өткізді.

Жиында қордың және орталықтың жұмысын жандандырудың маңыздылығы, атқаратын істері жайлы мағлұмат берді. Облыстағы жаңа бағытта жұмыс жасау туралы және алдағы жоспарлары бойнша айтып өтті.

Еске сала кетер бір жай, өткен жылы ҚМДБ жанынан «Уақып» қоры – қайырымдылық ұйымы құрылған болатын. Оның қызметі-әлеуметтік жобаларды қаржыландыруға, діни ағартушылық саладағы іс-шараларды жүргізуге, сондай-ақ дін қызметкерлерінің жұмысын жетілдіруге бағытталған.

Қостанай облыстық мешітінің баспасөз қызметі